Tơ̆ jơ pơma dơnuh, kon pơlei pơma tơbăt jơhngơ̆m đon lui yom kơtang hăm tơdrong chĕp pơgơ̆r đơ̆ng Khul kơdră Lâm Đồng lơ̆m khei ‘năr tơring tŏk bŏk tơjră muh măt hăm lơ tơdrong tơnap tap, tơdrong long. Adoi, hơpơi ‘meh vă dêh char Lâm Đồng kăl akŏm atŏk tơ iung dôm tơdrong ‘lơ̆ng lơ̆m tơdrong jang tơmang pơhiơ̆ păng choh jang sa; atŏk kơtang tơplih kơsô̆, mŭk drăm kơsô̆; lăng kơjăp tơmơ̆t jên jang pơm trong nơnăm, mă kăl rim tơdrong vă jang pơm trong gre rĕnh nhen Tân Phú - Bảo Lộc, Bảo Lộc - Liên Khương păng Đà Lạt - Nha Trang vă rơvơn lơ̆m tơgoăt tơring, pơtrŭt kơtang mŭk drăm-tơpôl atŏk tơ iung. Iung pơma pơtôch pơma dơnuh, ƀok Nguyễn Thái Học, Kơdră pơgia chĕp pơgơ̆r Đảng dêh char Lâm Đồng sơkơ̆t hơdăh, Kơdră chĕp pơgơ̆r Lâm Đồng tơgoăt iŏk kơjăp dôm nơ̆r tơgop, nơ̆r apĭnh đơ̆ng rim bơngai tang măt kon pơlei. Adoi pơma pơkăp gô akŏm hơmet pơ ‘lơ̆ng tơnap tap, tơhlăk tơhlĭn ou vă pơtrŭt Lâm Đồng atŏk tơ iung tôm tong, kơjăp ‘lơ̆ng.