Đei 2 ‘nu kon oei hŏk mau yăo tơ̆ hnam trưng teh đak pơjing, 1 khei unh hnam mŏ Nguyễn Ngọc Quỳnh tơ̆ apŭng Nam Đàn, dêh char Nghệ An athei kla dang 4 triu hlak jên hŏk păng oei xa tơ̆ lăm ăn kon. 2 ‘nu klo kăn tơtă công nhân ngăl, jên khei ưh sơđơ̆ng kơna rim khei athei ‘mơ ‘mĕt tôch ai vă man jên nôp ăn kon hŏk. Yoa thoi noh mưh iŏk đei nơ̆r tơroi hơioh mâm non păng hŏk tro đơ̆ng lăm 1 truh lăm 12 hŏk tơ̆ hnam trưng teh đak pơjing ưh đei nôp jên hŏk iŏk đơ̆ng sơnăm truh, mŏ ƀôh tôch tôch hơiă yoa tơjur ƀiơ̆ 1 păh jên hŏk ăn 2 ‘nu kon: “Nhen unh hnam nhôn, klo kăn tơtă jang kơđe mă lei đei 2 ‘nu kon, đei tơgŭm ưh đei nôp jên hŏk ăn bre mon ‘nŏh klo kăn ƀôh da ƀiơ̆ pơmat tat hăm tơdrong arih xa ƀiơ̆, kơna oh ƀôh tôch hơiă mưh đei tơdrong tơgŭm ‘nao âu.”

Hiôk hơiă đei ƀôh tơ̆ rim mĕ ƀă hŏk tro hăm tơdrong tơchơ̆t ưh đei nôp jên hŏk ăn hơiŏh đơ̆ng lăm mâm truh lăm 12 tơ̆ dôm hnam trưng teh đak pơjing đơ̆ng Anih tơm Chinh trĭ tơlĕch. Mŏ Nguyễn Thị Hương tơ̆ phường Đồng Tâm, kuơ̆n Hai Bà Trưng, Hà Nội pơma: “Hnam nhôn đei 2 ‘nu kon, 1 ‘nu hŏk jăl 2, 1 ‘nu hŏk lăm 10. Mât lơ̆m sơnăm hŏk truh đei tơgŭm ưh đei nôp jên hŏk ‘nŏh inh ƀôh tôch hơiă. Mă đơ̆ng jên hŏk ăn bre kon 1 khei ưh măh lơ mơ̆n ră, mă lei hăm tơdrong arih xa tơ̆ Hà Nội kŭm tôch kơ huach, oei hnam nhôn ‘nŏh oei thuê hnam đe ‘nŏh vang tơgop tŏ sĕt ƀiơ̆ ăn unh hnam, tơgŭm ăn unh hnam mong ƀiơ̆ kon jên lơ̆m tơdỏng arih xa.”

Oei mŏ Ngô Thị Mai tơ̆ apŭng Thạch Thất, Hà Nội ‘nŏh ăn tơbăt: “Inh kŭm tôch hơiă. Tơjur ƀiơ̆ kon jên hŏk, jô̆ pơđĭ lơ̆m sơnăm kŭm pôm păi mơ̆n, vă unh hnam nhôn chă mong măi, pơyoa ăn tơdrong nai kơ đe kon dơ̆ng. Iŏk yoa tơ̆ tơring tơrang nhen nhôn lăp tŏ sĕt đĕch, kơna tơgŭm ăn jên hŏk thoi noh kŭm tôch kăp gĭt.”

Kŭm hăm ưh đei nôp jên hŏk ăn đĭ đăng hŏk tro đơ̆ng lăm mâm non truh lăm 12 tơ̆ hnam trưng teh đak pơjing, đe ŏh hok tro hŏk tơ̆ hnam trưng kon pơlei pơjing kŭm đei ƀơk ăn jên hŏk kiơ̆ hnam trưng teh đak pơjing kiơ̆ tơdrong hơgăt đơ̆ng luơ̆t; kơsô̆ jên hŏk plŏh plĕch băl đơ̆ng hnam trưng teh đak pơjing păng hnam trưng kon pơlei pơjing kơdih ‘nŏh yoa unh hnam kla thim. Kiơ̆ ‘nhŏng Trần Văn Nghĩa tơ̆ dêh char Hà Nam, tơdrong tơgŭm ‘nâu gô tơgop pơm hơtŏk băl kơplăh hŏk tro hŏk tơ̆ hnam trưng teh đak pơjing păng hnam trưng đơ̆ng kon pơlei pơjing kơdih: “Hŏk tro hok tơ̆ hnam trưng kon pơlei pơjing gô đei tơgŭm 1 păh jên hŏk, inh ƀôh ‘nâu jĭ tơdrong tôch hơiă, gơ̆h pơma tôch ‘lơ̆ng. Yoa tơpă tơ̆ yăn âu sư ưh lăp tơjur ƀiơ̆ jên hŏk ăn inh đĕch mă oei ăn lơ mĕ ƀă đei kon hŏk tơ̆ hnam trưng kon pơlei pơjing kơdih hai, mă 2 dơ̆ng inh ƀôh sư tôch hơtŏ ‘lơ̆ng ăn đe kon mon hŏk tơ̆ hnam trưng kon pơlei pơjing păng hnam trưng đơ̆ng teh đak pơjing.

Kiơ̆ kơsô̆ chih jô̆ đơ̆ng Anih tơm vei lăng pơtho pơhrăm, tơdrong tơgŭm âu gô đei yoa ăn dang 23,2 triu ‘nu hŏk tro đơ̆ng lăm mâm non truh lăm 12 (tam mă jô̆ truh đe hŏk tro hŏk tơ̆ dôm anih pơtho tơdrong jang păng hŏk ƀô tŭk), vang tơgop pơm tơjur ƀiơ̆ jên huach ăn rim unh hnam, lăp hăm tơdrong tơgŭm tôch 'lơ̆ng đơ̆ng chăl chĕp kơ̆l pơgơ̆r, trong jang đơ̆ng Đảng, Teh đak hăm tơdrong pơtho pơhrăm păng lăp hăm trong jang atŭm kơ dôm teh đak pơdrŏng.