Tơ̆ jơ pơma dơnuh, kon pơlei tơƀôh đon lui ngeh hăm tơdrong chĕp kơ̆l, pơgơ̆r đơ̆ng kơdră dêh char Lâm Đồng lơ̆m khei ‘năr tơring tơjră hăm lơ mơmat tat, long nol. Hơdai hăm, ‘meh vă dêh char Lâm Đồng kăl akŏm hơtŏk tơiung tơmam pran lơ̆m tơdrong jang tơmang lăng păng choh jang sa; tŭn pran tơplih kơsô̆; lăng kăl tơmơ̆t jên jang pơm trong nơnăm, mă loi ‘noh jĭ dôm tơdrong jang pơm trong gre kơdâu hrĕnh tơm nhen Tân Phú - Bảo Lộc, Bảo Lộc - Liên Khương păng Đà Lạt - Nha Trang vă pơm hiôk lơ̆m jang hơdai tơring, lơ̆m tơring, pơtrŭt mŭk drăm - tơpôl hơtŏk tơiung.

Kơdră Anih vei lăng kon pơlei dêh char Lâm Đồng Trần Hồng Thái pơma hơdăh dêh char Lâm Đồng tŏk bŏk lơ̆m jăl jang pơih să trong tih vă hơtŏk tơiung, tŏk bŏk hơdrin pơm trong gre kơdâu hrĕnh pơih trong năm tơ̆ tơring găh Pơbăh, dôm trong tơƀưh tơring Tây Nguyên, Hơlĕch pơbăh, Pơbăh tŏk bŏk. Ƀok Trần Hồng Thái roi tơbăt, sơnăm truh, dêh char Lâm Đồng gô pơtơm pơm trong gre kơdâu hrĕnh. Đei trong nơnăm ‘nao đei tơdrong hơtŏk tơiung pran kơtang. Lơ̆m 2-3 sơnăm truh, dêh char Lâm Đồng gô tơgŭm hơdrol hơtŏk tơiung pơm trong nơnăm.

Kŭm tơ̆ jơ pơma dơnuh, Kơdră Anih vei lăng kon pơlei dêh char Lâm Đồng hlôi pơma dơnuh hăm dôm bơngai tang măt kon pơlei găh dôm tơdrong jang tơgŭm hơtŏk tơiung kơmăy kơmŏk, pơvih pơvăn, tơmang lăng, choh jang sa kơmăy kơmŏk ‘nao, tơplih kơsô̆, pơtho pơhrăm bơngai jang, sơng đei tơmơ̆t jên jang, mŭk drăm rơgoh, cham char, pơgang, pơtho pơhrăm tơ̆ hơnăp kơnh kơ dêh char.

Kŭm hăm ‘noh, kon pơlei kŭm tơroi, apĭnh, athei kơdră chĕp kơ̆l dêh char Lâm Đồng hơtŏk loi dơ̆ng tơdrong jang vei lăng tơmam drăm - cham char, tŭn hrĕnh tơdrong jang iŏk teh, ăn oei tơ̆ plei hle đơ̆ng dôm tơdrong jang tơm, hơtŏk tơiung hnam oei tơpôl asong hla ar gơh iŏk yua teh....

Lơ̆m noh, tơdrong jang ưh kơ đei tơlĕch jang păng pơdui đunh, pơm brăh brư tơmam drăm păng pơm pơhiơ̆ tơdrong hơtŏk tơiung kơ tơring kăl kơ jăh đei hơmet pơ ‘lơ̆ng. Ƀok Păng Ting Sin, tơ̆ thị trấn Lạc Dương, apŭng Lạc Dương, dêh char Lâm Đồng, pơma:

“Tơ̆ thị trấn Lạc Dương nhôn đei lơ tơdrong jang hơdrom băl păng pơdui đunh, đei chĕng hơmet teh pơdui đunh truh 20 sơnăm bơih mă lei oei tam mă tơlĕch jang đei. ‘Meh vă tih hloh đơ̆ng kon pơlei ‘noh jĭ dôm tơdrong jang ưh kơ đei iŏk yua, ưh kơ đei ‘lơ̆ng ‘noh hŭt, păng tơdăh đei chĕng hơmet teh ‘noh kăl kơ tơlĕch jang hloi”.

Hloh 20 nơ̆r tơgop đơ̆ng dôm bơngai tang măt tơ̆ jơ pơma dơnuh hlôi tơƀôh ăn dôm tơdrong mơmat tat ƀơ̆t mă tơdrong jang sir iŏk tơmam drăm kăl lơ̆m teh ƀơm ưh kơ ‘lơ̆ng truh tơdrong đei yua ăn kon pơlei lơ̆m tơdrong asong hla ar gơh iŏk yua teh; kăl kơ đei trong jang kơjung ƀiơ̆ vă vei lăng tơdrong đei yua ăn kon pơlei rong rơmo iŏk đak toh lơ̆m dêh char đei lôch đơ̆ng rŏng kơ ƀet pơgang vaccine, tơdrong jang hơdrom băl, vei lăng cham char. Hơdai hăm ‘noh, dôm bơngai tang măt tơƀôh ăn kăl kơ akŏm hơtŏk tơiung 2 tơdrong jang pran kơ Lâm Đồng ‘noh jĭ tơmang lăng păng choh jang sa, mă loi ‘noh jĭ choh jang sa kơmăy kơmŏk ‘nao, hơgei; tŭn pran tơplih kơsô̆.

Pơma pơtôch tơ̆ jơ pơma dơnuh, ƀok Nguyễn Thái Học, Bí thư kơplăh dang ei Anih jang Đảng dêh char Lâm Đồng pơma hơdăh, kơdră chĕp kơ̆l dêh char Lâm Đồng tơpăt chih iŏk pơđĭ dôm nơ̆r apĭnh, tơgop đơ̆ng bơngai tang măt rim răih kon pơlei. Hơdai hăm pơkăp gô akŏm hơmet pơ ‘lơ̆ng dôm tơdrong mơmat tat, tơhlăk tơhlĭn âu vă pơtrŭt Lâm Đồng hơtŏk tơiung tôm tơdrong, kơjăp.

"Inh athei Anih pơvih ăn Anih jang Đảng dêh char jang hơdai hăm Anih pơvih ăn Anih vei lăng kon pơlei dêh char akŏm tôm dôm nơ̆r tơgop đơ̆ng dôm bơngai tang măt păng roi tơbăt ăn kơ dôm anih jang kơpal, tơring đei hơnăp jang set hơlen hơmet pơ ‘lơ̆ng, roi tơbăt pơtôch ăn Khŭl chĕp kơ̆l pơgơ̆r Anih jang Đảng dêh char. Đei dôm tơdrong gơh jang đơ̆ng kơdră chĕp kơ̆l dêh char gô set hơlen hơmet pơ ‘lơ̆ng, tơdrong hơyơ gơh jang đơ̆ng  Trung ương ‘noh dêh char gô apĭnh”.

Bí thư kơplăh dang ei kơ Anih jang Đảng dêh char Lâm Đồng Nguyễn Thái Học pơma hơdăh pơkăp kơtang đơ̆ng Khŭl chĕp kơ̆l pơgơ̆r Anih jang Đảng dêh char hơdrin tơgoăt pôm nơ̆r ƀơ̆r đon, khŏm jang, đĭ jơhngơ̆m yua kơ tơdrong hơtŏk tơiung kơ Lâm Đồng; bơ̆jang tơnăp, ‘lơ̆ng păng rơgoh; khŏm tơplih dôm kang ƀô̆ pơm pơgăn tơdrong hơtŏk tơiung kơ dêh char.