Lơ̆m ƀai chih, Tổng Bí thư Tô Lâm tôch năng kăl tơdrong rơih hơmet bơngai jang ăn Hop akŏm. Găh hơmet khul jang kơpal, athei pơm ‘lơ̆ng ăn tơdrong chĕp kơ̆l pơgơ̆r đơ̆ng anih chĕp kơ̆l đảng hăm rim tơring, rim tơdrong jang kăl; năng kăl tơdrong ‘lơ̆ng, rơgei, ưh kơsĭ vă rơih pơtôm bơngai mă tơjur lê̆ tơdrong hơgăt; ưh kăl tơring yơ, anih jang yơ kŭm đei bơngai jang lơ̆m Khul kơdră  chĕp kơ̆l; bơngai jang lơ̆m Khul chĕp kơ̆l athei mă rơgei tơpă, jĭ bơngai dơ̆ng tang ăn khul đảng viên păng đei kon pơlei ‘mêm, lui yom; dôm bơngai jang lơ̆m khul chĕp kơ̆l athei tơgăl jĭ bơngai jang "tơgŭm gơ̆h hơgei" păng athei mât 1 ƀơ̆r đon, drơ̆ng pôm nơ̆r mưh tơchĕng păng bơ̆ jang, rơgŏh ‘lơ̆ng, hơđơ̆ng jơhngâm, mĭnh đon ưh đei tơplih.

Tổng Bí thư Tô Lâm pơma hơdăh: "Athei hơmet păng pơgơ̆r mă ‘lơ̆ng Hop akŏm Đảng ƀô̆ jơ̆p tơring năm truh Hop akŏm ‘măng mă 14 kơ Đảng, tơdrong tơm ‘nŏh pơma nuh, rơih hơmet bơngai vă pôk rơih đei bơngai chĕp kơ̆l anih jang Đảng tơ̆ rim tơring gơ̆h hơgei, pran kơtang. Akŏm jơhngâm rơih hơmet bơngai chĕp kơ̆l lơ̆m jăl ‘nao kiơ̆ mă trŏ hăm dôm tơdrong hlôi đei pơtho".

Prăt khei ‘năr jang kăch mang Việt Nam lơ̆m 95 sơnăm âu ki, hăm 13 ‘măng Hop akŏm, Ƀok Hô păng Đảng bơ̆n tôch tơrek truh tơdrong rơih bơngai jang. Hlŏh rim ‘măng hop akŏm, tơ̆ rim jăl jang kăch mang, Đảng bơ̆n pơjing khul kăn ƀô̆, tơgop tih tên ăn dôm tơdrong tơchơ̆t, pơjing đei dôm tơdrong jơnei gĭt kăl, hơnhăk teh đak bơ̆n roi đunh roi tŏk pran. Kơlih thoi noh, lơ̆m Hop akŏm tơ̆ rim jăl jang tơdrong rơih hơmet bơngai jang hơnơ̆ng đei năng jĭ tơdrong tih păng tôch gĭt kăl. Dôm tơdrong hơgăt đơ̆ng Đảng vă rơih kăn ƀô̆ đei chih tôch hơdăh. Mă đơ̆ng thoi noh, tơdrong "rơih thoi yơ vă trŏ?" oei hơnơ̆ng jing nơ̆r apinh tôch pơmat vă đei nơ̆r tơl.

Ƀok Vũ Văn Phúc, sơ̆ pơm Kơdră vei lăng Kơsơ̆p hla ar tơroi Cộng sản akhan: "Athei hơlen mă trŏ, mă ƀlep hăm rim kăn ƀô̆ vă chih tơmât lơ̆m hơnăn ăn Hop akŏm pôk rơih lơ̆m jăl ‘nao. Dôm bơngai tang măt vang truh hop akŏm kŭm athei hơlen năng chă rơih đei đe kăn ƀô̆ đei đon jang chinh trĭ kơjăp, rơgei, đei jơhngâm đon tơpăt ‘lơ̆ng lăp hăm tơdrong ‘mĕh vă đơ̆ng teh đak vă yak mât lơ̆m chăl jang tŏk đơ̆ng hơdrĕch hơdrung Việt Nam. Tơdrong chă rơih thoi yơ mă trŏ, mă ƀlep hăm kăn ƀô̆ chĕp kơ̆l ‘nŏh jĭ nơ̆r apinh tih đei tơlĕch hăm hơnăp jang đơ̆ng anih chĕp kơ̆l đảng jơ̆p tơring păng đảng viên jĭ bơngai dơ̆ng tang vang truh Hop akŏm Đảng ƀô̆ jơ̆p tơring".

Tơdrong jang kăn ƀô̆ kŭm đei pơma nuh vă hơtŏk hơnăp jang đơ̆ng bơngai chĕp kơ̆l mưh chă rơih bơngai, mă loi jĭ hăm bơngai jang pơtăl kiơ̆ dôm tơdrong hơgăt ‘nao đơ̆ng Trung ương. Tơdrong chih tơmât hơdăh hơnăp jang đơ̆ng bơngai rơih kăn ƀô̆ kăl đei pơm kiơ̆ mă ‘lơ̆ng vă rơih đei kăn ƀô̆ rơgei, đei jơhngâm đon tơpăt ‘lơ̆ng tơpă, kĕ chĕp kơl pơgơ̆r anih jang tơ̆ tơring păng tơ̆ Trung ương. Yoa, lơ̆m 1 khul tơpôl, ưh kơsĭ đĭ đăng rim bơngai vang yơ̆r ti rơih 1 ‘nu bơngai mă athei đei nơ̆r pơma tơƀôh, vă rim bơngai hơlen, pôk rơih. Bơngai rơih athei đei đunh khei ‘năr jang hơdoi hăm bơngai vă rơih ‘nŏh. Đe sư athei băt hơdăh tơdrong rơgei, jơhngâm đon ‘lơ̆ng đơ̆ng bơngai đei rơih, ưh kơsĭ chă roi pơgia, yoa bôl boăl păng mă hơdrĕch hơdrung kơdih, dăh mă "tĕch răt kơchư̆k" đơ̆ng rŏng kơ ‘nŏh rim tơdrong răm tŭh pơđĭ ăn khul tơpôl.

Tiến sỹ Vũ Dương Huân, sơ̆ pơm Kơdră Hnam hŏk jang tơbôl pơma hơdăh: "Lơ jăl adrol ki rơih kăn ƀô̆ mă lei đơ̆ng rŏng kơnh ưh đei pơm lăp hăm tơdrong ‘mĕh vă, ƀât lăp huŏng lơ̆m tơdrong yoch, đei rôp phak hloi. Bơngai chă rơih tôch gĭt kăl, rơih trŏ ‘nŏh đei kăn ƀô̆ rơgei, tơdăh rơih ưh trŏ ‘nŏh gô pơrăm hăm teh đak. Kơna athei đei đon jang mă tơnăp mưh chă rơih bơngai vă pôk pơm kăn ƀô̆. Hơtŏk hơnăp jang ưh lăp kơdih kâu bơngai ‘nŏh đĕch mă hăm anih rơih bơngai chă rơih bơngai ưh lăp hăm tơdrong ‘mĕh vă".

Đei 1 tơdrong tơ̆ yăn âu ‘nŏh jĭ Mưh hop akŏm, rơih hơmet bơngai vă jang, dôm bơngai đei rơih mât lơ̆m anih chĕp kơ̆l rơgŏh ‘lơ̆ng ngăl, mă lei mưh iŏk jang kơchưk yơ ‘nŏh bơih ‘nŏh sư pơtơm đei bưng ai, grih tih, jing đei đon ham kơ mŭk mam... đơ̆ng noh jing tơplih jơhngâm đon, năm kiơ̆ trong glăi. Tơdrong ‘nŏh ăn ƀôh, chă rơih bơngai jang ưh kơ đei ƀônh kiơ, athei bơ̆ jang mă ‘lơ̆ng, rơđăh rơđong; rơih hơlen dôm bơngai rơgei, đei jơhngâm đon tơpăt ‘lơ̆ng tơpă vă mât jang lơ̆m anih chĕp kơ̆l jăl ‘nao. Rim bơngai đei rơih tơpă jĭ dôm bơngai đei đon jang chinh trĭ rơgei, hơđơ̆ng jơhngâm, jĭ bơngai dơ̆ng tang ăn khul đảng viên păng đei kon pơlei ‘mêm, lui yom.

Ƀok Trần Ngọc Đường, Kơdră jang lơ̆m Khul kơdră chĕp kơ̆l Anih Trung ương MTTQ Việt Nam ăn tơbăt: "Tơdrong hơgăt tôch gĭt kăl ‘nŏh athei "tơpăt ‘lơ̆ng". Ưh đei "tơpăt ‘lơ̆ng" ‘nŏh ưh đei rơih tơmât lơ̆m anih chĕp kơ̆l. Tổng Bí thư Tô Lâm hlôi pơma hơdăh găh jơhngâm đon, hơnăp jang đơ̆ng bơngai đei rơih mât jang lơ̆m anih chĕp kơ̆l jăl truh. ‘Ngoăih dôm tơdrong hơgăt găh đon jang chinh trĭ, tơdrong gơ̆h hơgei, hŏk jrŭ ‘nŏh athei năng kăl truh jơhngâm "tơpăt ‘lơ̆ng" hai.

Vă pơgơ̆r đang ‘lơ̆ng Hop akŏm jơ̆p tơring năm truh Hop akŏm bơngai tang măt lơ̆m teh đak ‘măng mă 14 kơ Đảng, athei tơdrong rơih hơmet bơngai bơ̆ jang mă trŏ rim tơdrong hơgăt tôch kơjăp, gơ̆h hơgei păng trŏ ƀlep; veh ver tơdrong jang vă pơtrŏ, kư̆ kă, chă rơih bôl boăl, ‘nhŏng oh kơdih “vă tơmât". Atŭm hăm ‘nŏh, khŏm tang găn dôm bơngai chă trong tơgĕch iŏk, ‘mĕh tŏk chĕp kơ̆l pơgơ̆r kơdih, pơlung đe tơgŭm, pơjing khul grŭp ăn kơdih, chă trong pơyoa ăn khul grŭp, đei đon tơchĕng hơdrô̆, kiơ̆ tơring, rơih bơngai juăt... Athei jang ‘lơ̆ng tơdrong ‘nâu ‘mơ̆i mă gơ̆h rơih đei bơngai rơgei, đei jơhngâm đon ‘lơ̆ng tơpă; kĕ chĕp kơ̆l pơgơ̆r yak hlŏh rim tơdrong nol lơ̆m chăl ‘nao; bơ̆ jang đei hơnăp jang hơnhăk teh đak mât lơ̆m chăl ‘nao, chăl jang tŏk pơdrŏng, pran kơtang.