Kiơ̆ kơ ‘nŏh, ‘năr 2/1, ƀok Nghiêm hlôi gơih hla ar ăn Khul kơdră chĕp kơ̆l Đảng dêh char Đắk Lắk, Anih vei lăng kon pơlei dêh char Đắk Lắk păng Anih vei lăng jang kơmăy, tĕch mơdro, tơƀôh jơhngâm đon ‘mĕh pơdơ̆h hưu hrôih.

Lơ̆m hla ar chih, ƀok Nghiêm akhan, lơ̆m 40 sơnăm bơ̆ jang, ƀok jang găh lơ tơdrong păng hơnơ̆ng jang đang ‘lơ̆ng tơdrong jang đei pơjao. Lui kiơ̆ trong jang ‘nao đơ̆ng Đảng păng teh đak, vă pơjing tơdrong hiôk hian mưh hơmet ming anih jang, khul jang ăn teh đak, kơna ƀok pơm hla ar apinh pơdơ̆h hưu hrôih. Kơdră Anih jang Nội vụ dêh char Đắk Lắk akhan, tơdrong ƀok Nguyễn Văn Nghiêm apĭnh pơdơ̆h hưu jĭ tơdrong kăl kơ hôn bơnê, tơƀôh hơdăh đon kơchăng, bơ̆ jang tôch tơnăp, hơdai hăm ‘nŏh tơgŭm ăn dôm anih jang kơpal hiôk hian ƀiơ̆ mưh bơ̆ jang kiơ̆ nơ̆r pơtho đơ̆ng Trung ương găh tơdrong hơmet ming anih jang.