Vang truh hop akŏm, đei bơngai tang măt ăn Khul kơdră chĕp kơ̆l Jơnŭm pơgơ̆r kon pơlei 10 dêh char, plt tơ̆ tơring Tŏk bŏk, Tây Nguyên păng Kơdră chĕp kơ̆l Jơnŭm pơgơ̆r kon pơlei dôm apŭng, thĭ xăh, plt kơ dêh char Bình Định. Đơ̆ng rŏng 8 sơnăm bơ̆ jang kiơ̆ Luơ̆t Dăr lăng đơ̆ng Quốc hội păng Jơnŭm pơgơ̆r kon pơlei, tơdrong jang dăr lăng đơ̆ng Quốc hội, Jơnŭm pơgơ̆r kon pơlei roi đunh roi đei yoa, iŏk đei lơ tơdrong gĭt kăl, đei bơngai tăh hla păng kon pơlei tơchĕng 'lơ̆ng.

Tơ̆ hop akŏm, dôm bơngai tang măt oei pơma tơƀôh dôm tơdrong ưh tam mă lăp lơ̆m Luơ̆t dăr lăng đơ̆ng Quốc hội păng Jơnŭm pơgơ̆r kon pơlei 2015 păng tơlĕch nơ̆r athei chih pơkĕh Luơ̆t ‘nao đei hơmet ming 1,2 tơdrong găh bơ̆ jang dăr lăng đơ̆ng Quốc hội păng Jơnŭm pơgơ̆r kon pơlei. Pơma tơ̆ hop akŏm, Phŏ Kơdră Quốc hội Trần Quang Phương ăn tơbăt, Hop akŏm đei mơ̆ng lơ nơ̆r pơma tôch ‘lơ̆ng đơ̆ng bơngai tang măt ăn Jơnŭm pơgơ̆r kon pơlei dôm tơring. Phŏ Kơdră Quốc hội Trần Quang Phương athei, lơ̆m tơdrong athei chih hơmet ming Luơ̆t athei tơchĕng truh dôm tơdrong ưh kơlăp tơpă; tơdrong kăl đei chih hơmet ming, tơlĕch trong jang mă lăp ‘lơ̆ng.