Truh khei ‘năr dang ei, Hla ar chih pơjing ming Luơ̆t hơmet ming Luơ̆t Bơ̆jang dăr hơlen kơ Quốc hội păng Jơnŭm pơgơ̆r kon pơlei tơmơ̆t dơ̆ng 51 hơpăng lơ̆m 91 hơpăng pơting hăm Luơ̆t tơlĕch ăn dang ei đei vă jê̆ 60%. Phŏ Kơdră Quốc hội Trần Quang Phương roi tơbăt ‘măng hop a kŏm mă 9 truh âu kơnh, Quốc hội gô set hơlen tơdrong hơmet ming, tơmơ̆t dơ̆ng khôi luơ̆t tơm teh đak, Luơ̆t pơgơ̆r khŭl kơdră tơring păng lơ Luơ̆t nai, lơ̆m noh đei lơ tơdrong ƀơm kơtă truh Luơ̆t Bơ̆jang dăr hơlen kơ Quốc hội păng Jơnŭm pơgơ̆r kon pơlei, tơlĕch ăn athei hơnơ̆ng tơchĕng hơlen hơmet ming tôm hăm luơ̆t.

Phŏ Kơdră Quốc hội Trần Quang Phương tơroi rơđăh athei vei kơjăp tơdrong jang tơplih ‘nao đon tơchĕng, tơplih ‘nao trong pơjing luơ̆t, vă vei sơđơ̆ng luơ̆t hơmet pơ ‘lơ̆ng đei dôm tơdrong tơhlăk yan âu lơ̆m bơ̆jang dăr hơlen. Kăl kơ hơnơ̆ng tơchĕng hơlen vă pơjing luơ̆t kơđeh, tŏ sĕt pơtruh ăn Quốc hội tơgop nơ̆r tơ̆ ‘măng hop akŏm mă 9.