Tang măt ăn kơdră chĕp kơ̆l Đảng, teh đak, Phŏ Kơdră Quốc hội Trần Quang Phương jet gia pơma nuh, pơlung kăn ƀô̆ công đoàn, đoàn viên, công nhân bơngai jang, mă loi hăm đe đoàn viên, bơngai jang đei tơdrong arih xa pơmat tat, pơ̆k rơka ƀât oei bơ̆ jang, đei tơdrong jĭ jăn, bơngai ưh pŭn ai lơ̆m tơpôl. Phŏ Kơdră Quốc hội kŭm hăm khul jang hơpăh 300 tơpu tơmam Tết ăn đe đoàn viên, bơngai jang đei tơdrong arih xa pơmat tat.

Phŏ Kơdră Quốc hội athei anih jang đảng, khul kơdră tơring akŏm jơhngâm jang atok tơiung mŭk drăm, hơmet kơjăp khul linh, vei lăng ‘lơ̆ng tơdrong sơđơ̆ng hơdai hăm pơm hơtŏk tơdrong arih xa găh tơmam drăm păng jơhngâm đon ăn kon pơlei dôm hơdrĕch hơdrung lơ̆m dêh char, bơ̆ jang ‘lơ̆ng hlŏh dơ̆ng tơdrong vei lăng arih xa tơpôl, tơjur tơnuh hin. Hơdai lơ̆m năr, Khul jang năm ngôi, hơpăh tơmam ăn kăn ƀô̆, linh tơ̆ Kơđông linh vei lăng sơlam Ia Rvê, Khul linh jang mŭk drăm vei sơđơ̆ng teh đak 737, kăn ƀô̆, kră pơlei păng unh hnam đei kŏng, hŏk tro đei tơdrong arih xa pơmat tat tơ̆ apŭng sơlam Ea Súp.