Truh ngôi, hmach thơ thou Têt tơ̆ Anih Kanh sat Cơ động- Công an dêh char Kon Tum, Phŏ Kơdră Quốc hội Trần Quang Phương jet gia pơma nuh hăm đe kăn ƀô̆, linh găh tơdrong hơmet têt, mă loi jĭ đon kơchăng tơblăh, vei lăng ‘lơ̆ng tơdrong sơđơ̆ng lơ̆m tơpôl adrol, lơ̆m păng đơ̆ng rŏng kơ Têt Nguyên đán Ất Tỵ 2025. Tang măt ăn Kơdră chĕp kơ̆l Đảng, Teh đak, Phŏ Kơdră Quốc hội thơ thou ăn đe kăn ƀô̆, linh kŭm hăm hnam tơnŏ sơnăm ‘nao pran jăng grăng hơkâu, hiôk chơt, bơ̆ jang đang ‘lơ̆ng rom tơdrong jang mă Đảng, Teh đak păng kon pơlei pơjao ăn.

Adrol kơ ‘nŏh, Phŏ Kơdră Quốc hội Trần Quang Phương kŭm hăm Khul jang đơ̆ng Trung ương năm ngôi, hmach thơ thou Têt Nguyên đán Ất Tỵ 2025 ăn Mĕ Việt Nam nuih mơng Đặng Thị Thu, tơ̆ phường Duy Tân, plt Kon Tum; năm ngôi tơ̆ unh hnam ƀok Sô Lây Tăng, sơ̆ jang lơ̆m Trung ương Đảng, pơm Bí thư Đảng dêh char, pơm hloi Kơdră chĕp kơ̆l Khul tang măt Quốc hội dêh char Kon Tum. Hơdai lơ̆m năr 14/1, Phŏ Kơdră Quốc hội Trần Quang Phương kŭm hăm khul jang đơ̆ng Trung ương năm ngôi, hmach thơ thou Têt ăn Khul kơdră pơgơ̆r, kon pơlei xăh Sa Loong păng kăn ƀô̆, linh tơ̆ 1,2 kơđông linh lơ̆m apŭng sơlam Ngọc Hồi, dêh char Kon Tum. Tơ̆ plt Kon Tum năm ngôi, hmach thơ thou Têt tơ̆ Anih chĕp kơ̆l Đảng dêh char, Anih vei lăng kon pơlei dêh char, Anih chĕp kơ̆l pơgơ̆r khul linh dêh char, Anih chĕp kơ̆l khul linh Ƀô đô̆i vei lăng tơring sơlam dêh char păng Công an dêh char Kon Tum./.