Bơnê kơ dôm tơdrong mă Trung đoan Kanh sat kơ đŏng Tây Nguyên hlôi jang đei lơ̆m dôm tơdrong jang, Phŏ Kơdră teh đak bơ̆n Võ Thị Ánh Xuân pơgơ̆r hăm Trung đoàn pơtoi iŏk yua tơdrong juăt jue kơ anih linh nuih mơng, tơguăt hăm Đảng, Teh đak păng kon pơlei, tơguăt tơguăl drơ̆ng nơ̆r lơ̆m tơlĕch jang. Akŏm pơjing khul Kanh sat kơ đŏng “Tơpă hlăng 'lơ̆ng, kơjăp kơtang, gơh hơgei, hơbĕch hơbal, trŏ hăm sơnong tơlĕch lơ̆m chăl 'nao”.

Jang tơnăp tơdrong pơtho chĭnh trĭ đon tơchĕng, pơtho gah juăt jue, pơm jang đei jơnei 6 tơdrong mă Ƀok Hô pơtho Kŏng an kon pơlei, pơ-'nam hŏk pơhrăm, pơtâ̆p gah rim tơdrong vă hơtŏk 'lơ̆ng đon bơnôh chĭnh trĭ kơjăp sơđơ̆ng, đon bơnôh tơguăt hăm Đảng, hăm Teh đak păng pơm jang tơnăp hăm kon pơlei. Hăt hot vang jang vă hơtŏk mŭk drăm tơpôl, vei sơđơ̆ng tơdrong pơyua ăn tơpôl, pơm kiơ̆ dôm tơdrong jang sut lê̆ hnam hyah hyok, hnam pơgia tơ̆ tơring, mă hăt noh hăm dôm tơring kon pơlei kon kông.