Pơtôch ‘măng hop akŏm, Phŏ Thủ tướng Mai Văn Chính lăng ‘lơ̆ng dôm anih tơm, anih jang trung ương đei kơsô̆ klăih song păng tơlĕch jên tơmơ̆t jang teh đak 2025 tơ̆ kơsô̆ lơ. Hăm dôm anih tơm, anih jang trung ương hiơ̆ kơ tơlĕch jên jang yua đơ̆ng tơhlăk tơhlĭn găh iŏk teh, bơ̆jang ưh kơ jăh tơ tĕnh, tơhlăk tơhlĭn găh teh, tơmam, Phŏ Thủ tướng Mai Văn Chính athei lăng kiơ̆ tơdrong hlôh vao păng jang kiơ̆ tôm, tơlĕch jang tơpăt tơdrong tơchơ̆t đơ̆ng Thủ tướng; hơtŏk loi dơ̆ng kơdră chĕp kơ̆l pơgơ̆r, rơđăh bơngai, rơđăh hơnăp jang, đei ‘lơ̆ng, jơnei.

Vă tơlĕch jang vei sơđơ̆ng kơsô̆ tơlĕch jên tơmơ̆t jang teh đak sơnăm 2025 iŏk đei tơdrong hơgăt hloh 95% trong tơlĕch jang đơ̆ng Thủ tướng pơjao, Phŏ Thủ tướng athei dôm anih jang, anih tơm tŭn pran klăih song păng tơlĕch jên tơmơ̆t jên jang teh đak sơnăm 2025, lơ̆m noh athei hiơ̆ hloh lơ̆m hơtuchkhei 3 athei jang đang klăih song hơdăh trong tơlĕch jang jên tơmơ̆t jên jang teh đak sơnăm 2025.