Đơ̆ng rŏng 1 sơnăm pơm kiơ̆ Tơchơ̆t đơ̆ng Anih tơm Chĭnh trĭ gah tơring păng pơm jang kơ Jơnŭm pơgơ̆r jang tơring Tây Nguyên, jơnŭm pơgơ̆r jang kơ tơring hlôi đei lơ tơdrong jang, tơlĕch lơ tơchơ̆t jang vă hơtŏk Tơring Tây Nguyên. Pơkăp GRDP sơnăm 2024 kơ tơring Tây Nguyên  đei hloh 484 rơbâu tih hlj; GRDP rim kơ̆l bơngai đei pơhlom 78,5 triu hlj hăm minh 'nu jang, tŏk 16% pơtêng hăm sơnăm 2023. Tơ̆ 'măng hop akŏm, kơdră kơ dôm dêh char tơring Tây Nguyên hlôi tơgop lơ nơ̆r vă hơtŏk tơring Tây Nguyên lơ̆m khei năr truh.

Sơkơ̆t pơtôch tơdrong pơm jang, Phŏ thủ tướng teh đak bơ̆n Nguyễn Hòa Bình ră hơdah, 6 tơdrong jang ming man anih kăl tŏk bŏk oei đei tơlĕch jang vă pơtoi Tây Nguyên hăm dôm tơring dơnơm. Mă lei dang ei pơtơm đei tơdrong ming man trong nơnăm Đăk Lăk - Nha Trang đei ming man tơnăp, oei 5 tơdrong jang nai noh adar hloh, đei tơdrong jang pơtơm asong jên 8%. Phŏ Thủ tướng pơgơ̆r rim tơring jang kơjăp hăm rim anih jang kơpal vă chă trong pơklaih, hơtŏk tenh tơdrong ming man, vă dah hrôih iŏk yua mŭk drăm hlôi đei kơ tơring Tây Nguyên.