Tơroi ăn Thủ tướng New Zealand găh tơdrong jang mŭk drăm, tơpôl tơ̆ plt, ƀok Nguyễn Văn Được ăn tơbăt: jĭ plt hơbĕch hơbal hlŏh lơ̆m teh đak, plt HCM đei lơ tơdrong ‘lơ̆ng vă tơmât jên jang păng atŏk tơiung lơ tơdrong. Kơdră vei lăng kon pơlei plt hơmĕng, ‘măng năm ngôi đơ̆ng Thủ tướng Christopher Luxon gô pơih đei tơdrong ‘lơ̆ng vă hơtŏk tơdrong tơmât jên jang đơ̆ng anih tĕch mơdro kơ New Zealand tơ̆ plt lơ̆m khei ‘năr truh.

Thủ tướng Christopher Luxon akhan, vă Việt Nam jing teh đak đei iŏk yoa lơ lơ̆m sơnăm 2045 nhen đon pơhnŏng đei tơlĕch ‘nŏh oei đei lơ tơdrong kăl bơ̆ jang dơ̆ng. Ƀok hơpơi ‘mĕh ‘măng năm ngôi mă ‘nâu gô tưk tơiung tơdrong pơvei jang hơdoi tôm tơdrong đơ̆ng 2 teh đak, pơjing tơdrong ‘lơ̆ng vă 2 păh vang jang hơdoi găh lơ tơdrong nhen mŭk drăm, tĕch mơdro, chă tơmang lăng, choh jang xa.