Hop akŏm đảng ƀô̆ jơ̆p tơring jăl jang đơ̆ng 2025 - 2030 tôch gĭt kăl. ‘Nâu ưh lăp 1 tơdrong jang chinh trĭ  tih hăm đĭ đăng Đảng, đĭ đăng kon pơlei đĕch mă oei jing tơdrong tơm vă gơ̆h pơgơ̆r đang ‘lơ̆ng Hop akŏm bơngai tang măt lơ̆m teh đak ‘măng mă XIV kơ Đảng. Tih hlŏh dơ̆ng, tơdrong ‘nâu jĭ 1 lơ̆m dôm tơdrong tôch gĭt kăl pơjing anih jang chinh trĭ pran kơjăp vă hơnhăk teh đak jang tŏk pran ‘lơ̆ng mât lơ̆m chăl ‘nao, chăl jang tŏk pran, pơdrŏng, hơnŭk hơnoa, dơ̆ng hơdai hăm dôm tih đak pơdrŏng lơ̆m plei teh nhen đon hơpơi ‘mĕh đơ̆ng Ƀok Hô ‘mêm kơ eng păng tơdrong ‘mĕh vă đơ̆ng đĭ đăng hơdrĕch hơdrung.

Mă tơpă mư̆h bơ̆ jang kăch mang Việt Nam ăn ƀôh, Hop akŏm đảng ƀô̆ jơ̆p tơring đei hơnăp jang chông hơnhăk, tơƀôh trong, jĭ jrăng tơjră tơm dơnơm ƀơm truh tơ̆ đĭ đăng Đảng đĭ đăng tơpô. Hop akŏm Đảng ƀô̆ jơ̆p tơring ‘măng mă âu đei 3 tơdrong jang tơm, ‘nŏh jĭ: pơma nuh, pơdrơ̆ng nơ̆r ăn Hla ar kăl tơ̆ Hop akŏm tơring păng tơgop nơ̆r ăn Hla ar chih kăl tơ̆ Hop akŏm kơpal, Hla ar chih kăl kơ Hop akŏm mă XIV kơ Đảng; chă rơih bơngai mât jang lơ̆m dôm Khul kơdră chĕp kơ̆l đảng; hơmet pơ ‘lơ̆ng bơngai jang lơ̆m Rim anih chĕp kơ̆l Đảng đơ̆ng tơring truh tơ̆ Trung ương. Dôm tơdrong ‘nâu tơtă dôm tơdrong “tôch git kăl” ngăl, ƀơm truh hơnăp jang chĕp kơ̆l pơgơ̆r, kơsư̆k tơblăh đơ̆ng Đảng; truh tơdrong tơlĕch trong jang, trong chĕp kơ̆l pơgơ̆r; pơjing jơhngâm pran ăn Đảng păng anih jang chinh trĭ; truh tơdrong chĕp kơ̆l pơgơ̆r đơ̆ng rim anih jang đảng jơ̆p tơring lơ̆m jăl truh kŭm nhen jơhngâm pran đơ̆ng đĭ đăng hơdrĕch hơdrung tơ̆ hơnăp kơnh.

Đảng bơ̆n jĭ đảng chep kơ̆l, Đảng chĕp kơ̆l kiơ̆ trong jang. Hla ar chih kăl đơ̆ng Hop akŏm Đảng jơ̆p tơring tơƀôh hơdăh đon tơchĕng, trong vă chĕp kơ̆l pơgơ̆r đơ̆ng Đảng kiơ̆ rim trong jang tôch hơdăh, lăp hăm yăn âu tơ̆ rim anih jang, tơring tơrang, tơdrong jang đei pơjao; gơ̆h tơĕch trong chĕp kơ̆l pơgpơ̆r, pơtho tơƀôh, hơmet pơ 'lơng dôm tơdrong tam mă lăp, tơgĕch iŏk tôch ai dôm tơdrong 'lơ̆ng, hiôk hian, hơmet ming dôm tơdrong tơhlăk oei găn trong, akŏm tôch ai tơdrong vang jang đơ̆ng kăn ƀô̆, đảng viên păng kon pơlei, pơjing jơhngâm pran tih tên vă iŏk đei păng jang tŏk lơ hlŏh tơdrong hơgăt, vang tơgop jang đang '‘ơ̆ng rim tơdrong pơhnŏng, trong vă jang mă Trung ương dăh mă đảng ƀô̆ kơpal hlôi tơlĕch. Pơm 'lơ̆ng vă rim nơ̆r vang tơgop lơ̆m Hla ar chih kăl tơ̆ tơring, Hla ar chih kăl tơ̆ kơpal, đơ̆ng đe kơdră chĕp kơ̆l kŭm nhen Hla ar chih kăl kơ Hop akŏm mă XIV kơ Đảng, mă loi jĭ dôm nơ̆r pơma tơlĕch trong jang đei 'moi kiơ̆ dôm tơdrong arih xa tơ̆ tơring, tơdrong arih xa kơ kon pơlei lơ̆m tơpôl tơ̆ jơ̆p tơring, jô̆ hloi tơ̆ pơlei pơla, khul tơpôl păng rim bơngai, pơjing jơhngâm pran hưch hanh, čhôk 'nă păr ang jơ̆p jang tơring lơ̆m teh đak 'nŏh jĭ đon pơhnŏng mă rim anih chĕh kơ̆l Đảng athei jang đei.

Bơngai jang lơ̆m Khul kơdră, anih chĕp kơ̆l đảng ‘nŏh jĭ khul kăn ƀô̆ chĕp kơ̆l, vei lăng, kăn bô̆ tơm dơnơm tơ̆ rim anih jang, tơring tơrang, khul grŭp; jĭ “gơng tơƀưh” đơ̆ng Đảng, teh đak hăm kon pơlei, jĭ khul chĕp kơ̆l pơgơ̆r, tơƀôh trong chong glung, pơgơ̆r bơ̆ jang, hơnhăk dôm trong jang đơ̆ng Đảng, khôi luơ̆t teh đak mât lơ̆m tơdrong arih xa; atŭm hăm ‘nŏh, băt hơdăh rim tơdrong vă tơlĕch nơ̆r pơma hăm Đảng, teh đak, tơlĕch đei dôm trong jang lăp hăm đon hơpơi ‘mĕh, tơdrong đei yoa tôch tơgăl đơ̆ng kon pơlei. Bí thư, Phó bí thư, kơdră jang lơ̆m Khul chĕp kơ̆l hơnơ̆ng jĭ bơngai tôch gĭt kăl, vă gơ̆h jang ‘lơ̆ng tơdrong chinh trĭ, vei kơjăp tơdrong sơđơ̆ng, jang tŏk pran tơ̆ rim tơring, anih jang kơplăh dang ei păng đunh đai ning mônh kơnh hai.

Vă pơgơ̆r đang ‘lơ̆ng Hop akŏm đảng ƀô̆ jơ̆p tơring jăl jang đơ̆ng 2025-2030, rim anih chĕp kơ̆l đảng athei ‘moi kiơ̆ Nơ̆r pơtho kơsô̆ 35 ‘năr 14/06/2024 đơ̆ng Anih tơm Chinh trĭ “găh Pơgơ̆r Hop akŏm đảng ƀô̆ jơ̆p tơring năm truh Hop akŏm bơngai tang măt lơ̆m teh đak ‘măng mă XIV kơ Đảng” păng nơ̆r tơchơ̆t kơsô̆ 118 ‘năr 18/01/2025 đơ̆ng Anih tơm Chinh trĭ găh hơmet ming, chih tơmât dơ̆ng Nơ̆r pơtho kơsô̆ 35 kơpal.

Ƀât mă bơ̆n oei adrin tơlĕch jang kiơ̆ tơdrong Tơchơ̆t kơsô̆ 18 đơ̆ng Anih tơm Chinh trĭ găh hơmet ming, kăt tơjur khul bơngai jang, anih jang lơ̆m rim anih jang chinh trĭ, rim anih chĕp kơ̆l đảng athei jăh hơmet pơ ‘lơ̆ng khul grŭp, jăh pơgơ̆r bơ̆ jang mă sơđơ̆ng ‘lơ̆ng păng hơnơ̆ng hơmet ming khul bơngai jang tơ̆ rim anih jang, tơring tơrang. 4 Đảng ƀô̆ ‘nao đei pơjing ‘nŏh Đảng ƀô̆ dôm Anih jang jang Đảng Trung ương, Đảng ƀô̆ Khul kơdră teh đak, Đảng bộ Quốc hội, Đảng bộ Mặt trận Tổ quốc; 1,2 anih jang kơ Đảng trung ương ‘nao đei hơmet ming; dôm đảng ƀô̆, chi ƀô ‘nao tơ̆ 1,2 Anih tơm, dôm dêh char, plt... năng kiơ̆ hơnăp jang, tơdrong jang đei chih tơlĕch vă jăh pơgơ̆r bơ̆ jang sơđơ̆ng ‘lơ̆ng trŏ tơdrong hơgăt đơ̆ng Đảng păng dôm tơdrong hơgăt ‘nao đơ̆ng Khul kơdră chĕp kơ̆l trung ương mưh pơgơ̆r bơ̆ jang kŭm nhen pơgơ̆r Hop akŏm đảng ƀô̆, chi ƀô̆.

Vă pơgơ̆r ‘lơ̆ng Hop akŏm Đảng ƀô̆ jơ̆p tơring, khul kơdră chĕp kơ̆l athei akŏm jơhngâm bơ̆ jang 3 tơdrong tơm tơ̆ hơla âu:

-Mă mônh, athei drơ̆ng nơ̆r găh đon tơchĕng, hlôh vao hơdăh dôm tơdrong jơnei mă teh đak iŏk đei đơ̆ng rŏng 95 sơnăm đei Đảng chĕp kơ̆l pơgơ̆r, mă loi đơ̆ng rŏng 40 sơnăm tơplih ‘nao ‘nŏh tôch tih tên, tôch tơgăl vă lui yom, čhôk ‘nă. Mă lei teh đak bơ̆n oei tơjră hăm lơ tơdrong pơmat tat, pơlong nol mă đĭ đăng Đảng, đĭ đăng kon pơlei, đĭ đăng khul linh bơ̆n athei adrin mât 1 ƀơ̆r đon, adrin hlŏh dơ̆ng vă gơ̆h yak hlŏh, lơ̆m noh Hop akŏm đảng ƀô̆ jơ̆p tơring jăl jang 2025-2030 đei hơnăp jang athei vang akŏm jơhngâm păng jing khul jang tơm dơnơm vă sek tơlang ‘lơ̆ng dôm tơdrong pơmat tat, pơlong nol âu. Lơ tơdrong oei tơhlăk, găn trong, pơm ưh ‘lơ̆ng đunh kơ âu oei tam mă hơmet pơ ‘lơ̆ng, sek tơlang đĭ ‘năi. Tơdrong krê “dơ̆ng kơtă 1 ƀôt”, krê roi jur tơ̆ rŏng, mă loi găh mŭk drăm, găh khoa hŏk, kơmăy kơmŏk păng huŏng lơ̆m đong “đei iŏk yoa păh lăp” oei đei đĕch.

-Mă 2, găh tơdrong chih pơjing hla ar kăl păng vang tơgop nơ̆r ăn Hla ar kăl tơ̆ hop akŏm kơpal, Hla ar kăl kơ Hop akŏm mă XIV kơ Đảng. Hla ar chih tơroi chinh trĭ vă ră roi lơ̆m Hop akŏm Đảng ƀô̆ jơ̆p tơring ‘moi kiơ̆ dôm hla ar chih kăl vă tơroi lơ̆m Hop akŏm mă XIV; akŏm jơhngâm tơblang hơdăh, tơchĕng hơlen mă trŏ dôm tơdrong tơchơ̆t đơ̆ng Hop akŏm âu ki; chih tơroi mă tôm, trŏ hăm yăn âu hăm tơdrong jang tŏk tơ̆ tơring, anih jang, tơdrong jang, khul grŭp. Pơm hơdăh dôm tơdrong jơnei ‘nao, ‘lơ̆ng hơiă lơ̆m tơdrong chĕp kơ̆l pơgơ̆r đơ̆ng anih jang đảng; athei năng tơpăt rim tơdrong, hơlen năng mă trŏ, pơma hơdăh rim tơdrong đei tơpă, athei roi tơƀôh dôm tơdrong tam mă ‘lơ̆ng, tam mă pran, mă loi hăm dôm tơdrong oei tơhlăk, chĭt găn trong hăm tơdrong jang tŏk tam đei hơmet pơ ‘lơ̆ng.

-Mă 3, kăl hlŏh jĭ năng kăl truh tơdrong rơih hơmet bơngai jang tơ̆ Hop akŏm. Athei hlôh vao mă hơdăh, rơih hơmet bơngai jang mă ‘lơ̆ng, ưh lăp ăn 1 jăl jang đĕch mă hơtăih hlŏh dơ̆ng, ‘nŏh jĭ hơmet bơngai jang ăn ning mônh kơnh vă jang tŏk đơ̆ng anih jang đảng, jang tŏk tơ̆ rim anih jang, tơring tơrang; xă hlŏh dơ̆ng ‘nŏh jĭ tơdrong arih đơ̆ng Đảng, tơdrong pơgơ̆r đơ̆ng chăl chĕp kơ̆l păng tơdrong jang tŏk kơ teh đak, kơ hơdrĕch hơdrung. ‘Nâu jĭ tơdrong mă kăn ƀô̆, đảng viên păng kon pơlei tôch tơrek; kŭm jing tơdrong mă dôm bơngai đei đon kơnê̆, ‘mĕh phă ngơ̆r chă trong pơvĕr, chih tơlĕch lơ tơdrong tơroi kư̆ kă vă pơm che re băl. Găh hơmet ming bơngai jang lơ̆m Khul chĕp kơ̆l đảng, athei pơm ‘lơ̆ng tơdrong chĕp kơ̆l tôm tơdrong đơ̆ng anih chĕp kơ̆l pơgơ̆r hăm rim tơring, rim tơdrong jang gĭt kăl; năng tơdrong ‘lơ̆ng, ưh kơ ssĭ yoa rơih hơmet mă lăp mă pơm tơjur tơdrong hơgăt; ưh kơ kăl tơring, anih jang yơ kŭm đei bơngai lơ̆m anih chĕp kơ̆l đảng; khul kơdră chĕp kơ̆l đei rơih athei jing bơngai chĕp kơ̆l tơm dơnơm găh chinh trĭ, jĭ bơngai tang măt ăn khul đảng viên păng đei kon pơlei lui yom; dôm kơdră chĕp kơ̆l athei tơgăl jĭ “dôm bơngai hlôh vao jrŭ” mât 1 ƀơ̆r đon, drơ̆ng pôm nơ̆r găh đon tơchĕng păng bơ̆ jang, rơgŏh ‘lơ̆ng tơpă, jơhngâm đon nuih mơng, ưh đei tơplih kiơ. Athei hơtŏk hơnăp jang đơ̆ng bơngai bơngai chĕp kơ̆l lơ̆m tơdrong roi tơƀôh, rơih bơngai jang, mă loi jĭ dôm bơngai jang pơtăl kiơ̆ tơdrong hơgăt ‘nao đơ̆ng Trung ương.

Kơchăng, adrin jang ‘lpơ̆ng tơdrong jang roi tơƀôh găh đon tơchĕng, roi tơbăt mă hơdăh vă pơjing tơdrong drơ̆ng pôm nơ̆r lơ̆m đảng ƀô̆ păng tơdrong tơgŭm đơ̆ng khul grŭp tơpôl, kon pơlei; hơmet kơjăp, pơm hơtŏk đon lui đơ̆ng đe kăn ƀô̆, đảng viên păng kon pơlei hăm anih jang đảng. Pơjing tơdrong ‘lơ̆ng, hiôk hian vă tưk tơiung đon rơgei păng tơdrong vang jang đơ̆ng đĭ đăng kon pơlei lơ̆m tơdrong chih pơjing dôm Hla ar kăl păng tơdrong jang kăn ƀô̆, tơgop ‘lơ̆ng, đei yoa ăn tơdrong jơnei đơ̆ng Hop akŏm, jăh tơmât tơdrong tơchơ̆t đơ̆ng Hop akŏm Đảng lơ̆m tơdrong arih xa yăn âu, hơnhăk ba tơdrong arih xa phĭ tơtŏ dơnŏ 'lơ̆ng, hiôk chơt ăn rim bơngai.