Anih chĕp kơ̆l pơgơ̆r Quốc hội vă tơgop nơ̆r găh tơdrong chih tơblang, hơmet ming Luơ̆t jang kơmăy kơmŏk sô̆ oei chih; Luơ̆t tơdrong jang (oei hơmet ming); luơ̆t hơmet ming, chih tơmât dơ̆ng 1,2 tơdrong lơ̆m Luơ̆t Kuang kăo; luơ̆t hơmet ming, chih tơmât dơ̆ng 1,2 tơdrong lơ̆m Luơ̆t tơdrong hơgăt găh ki thuơ̆t.

Găh noh dơ̆ng, Anih chĕp kơ̆l pơgơ̆r Quốc hội vă hơlen năng, drơ̆ng nơ̆r ăn Tơdrong tơchơ̆t atŭm chih hơdăh tơdrong pơgơ̆r tơƀâp bơngai tăh hla đơ̆ng bơngai tang măt Quốc hội păng bơngai tang măt Jơnŭm pơgơ̆r kon pơlei; Tơdrong tơchơ̆t ăn Anih chĕp kơ̆l pơgơ̆r Quốc hội chih hơdăh tơdrong kon pơlei pơm tơm hơtŏ ‘lơ̆ng lơ̆m dôm anih jang kơ Quốc hội, anih jang găh Anih chĕp kơ̆l pơgơ̆r Quốc hội, dôm anih jang găh Jơnŭm pơgơ̆r kon pơlei jơ̆p tơring. Ƀlep ƀât ‘măng mă âu, Anih chĕp kơ̆l pơgơ̆r Quốc hội oei tơgop nơ̆r găh tơdrong hơmet ăn Hop akŏm ưh ê ‘măng mă 9, Quốc hội jăl XV.