Tơ̆ buôn Trâp, tơring Cư Mgar, dôm trong iĕ ‘lơ̆ng hơ iă ƀar păh trong dơnơm ‘long brơ̆ch brăch, ƀrông ƀrang pơkao chôh rang. Măkăl hlŏh ‘noh dôm hla kơ ƀrê, sơnglong dreng păr mơ liơk, pơm ăn pơlei pơla sa roi ‘lơ̆ng rŏ, hưch hanh hơmanh bơnê kơ hơdrĕch hơdrung. H’Hằng Ê Ban, minh ‘nu hơdruh pơlei ƀuôn Trâp tơbăt:“Đei pơjao tơdrong jang chă hơtol hla kơ jơp trong lơ̆m pơlei, ba hiôk chơt dêh. Tơdrong chă hơtol hla kơ pơm ăn kơ ba sa roi băt hlôh ƀôh hơdăh hloh dơ̆ng tơdrong joăt joe kĕch mang kơ hơdrĕch hơdrung, găh chăl sơnăm kơ Đảng păng sa roi hưch hanh hơmanh bơnê kơ pơlei pơla kơdih bơ̆n hloh dơ̆ng.”

Jăl trong hla kơ kơ pơlei ƀuôn Trâp hơtăih kơjung 1km, đei chă hơtol đơ̆ng năr pơgơr Tơgpoăt tơgoăl, đơ̆ng rong ‘noh đei chă hơtol lơ̆m jơ ‘năr Hop akŏm tih kơ Đảng. Ƀuôn trơng Y Suinh Buôn Yă tơbăt:“Mưh tơlech ăn chă hơtol hla kơ, kon pơlei bu bu jei chơt hơ iă. Rim ŭnh hnam chă răt kơdih hla kơ păng chă hơtol. Găh hla kơ Đảng ‘noh unh hnam ayơ đei bơngai đảng viên ‘noh mă hơtol, găh Hla kơ Teh đak ‘noh ŭnh hnam ayơ jei hơtol ngăl, vă pôk pơ ư teh đak.”

Đơ̆ng ƀuôn Trâp, tơlech jang trong hla kơ Teh đak hlôi lang să kơtang. Tơring Cư Mgar hrei ou đei 7km trong hla kơ, pơđĭ trong tơm hăm đĭ đăng 11 pơlei pơla. Yă Hồ Thị Thanh Hải, Kơ iĕng Kơdră chĕp pơgơ̆r Đảng tơring Cư Mgar, tơbăt:“Hrei ou đĭ đăng 11 pơlei jei đei ming hơmet pơ ‘lơ̆ng trong hla kơ păng chă hơtol dôm hla kơ Teh đak, hla kơ Đảng tôch kơ ‘lơ̆ng. Mưh bơ̆n chă yak tơ̆ trong hla kơ pơlei ‘noh jơhngơ̆m ba hiôk chơt dêh, ‘nou jei jing trong tơ iung pơjing tơgoăt tơgoăl pôm nơ̆r ƀơr đon hơdrĕch hơdrung adoi nhen vei lăng Teh đak.”

Tơ̆ thôn Tiến Thịnh, tơring Quảng Tiến, apŭng Cư Mgar, rim ŭnh hnam jei chă hơtol hla kơ tơ̆ ‘măng jang ƀơ̆t rim năr lêh, mă kăl lơm năr Têt Nguyên đán păng Năr pơjing Đảng. Hăm vă jê̆ 400 ŭnh hnam, thôn Tiến Thịnh ‘noh minh lơ̆m dôm tơring mă blŭng jang kiơ̆ trong hla kơ. Ƀok Nguyễn Tấn Chờ, thôn trưởng thôn Tiến Thịnh, tơbăt.:“Mưh mĭnh pơlei đei mĭnh trong hla kơ ‘noh jĭ tơdrong hiôk chơt hloh kơ tơring. Trong hla kơ kơ thôn Tiến Thịnh jĭ thôn blŭng a pơm trong hla kơ, jĭ trong yŭk hơ lou kơ apŭng. Ba yom hăm hla kơ ‘noh jĭ ba lui yom kơ Teh đak, kơna ba hơtol hla kơ.”

Trong hla kơ ou tơ̆ thôn Tiến Thịnh, tơring Quảng Tiến đei tơlĕch jang kiơ̆ đơ̆ng sơnăm 2016, đơ̆ng rŏng ‘noh hlôi lang să truh tơdrou pơlei lơ̆m tơring. Yă Nguyễn Thị Thanh Vân, Kơ iĕng Kơdră chĕp pơgơ̆r Hơnih vei lăng kon pơlei tơring Quảng Tiến tobăt.“Sơ̆ rim bơngai chă hơtol gô mơ̆ng kiơ̆ kơdih, đơ̆ng rŏng ‘noh tơring hlôi pơrô̆ pơ đĭ 6 thôn vang jang kiơ̆ trong hla kơ, truh dang ei, rim thôn jei pơm kiơ̆ trong hla kơ păng kon pơlei tôch lăp đon pơm kiơ̆ tơnăp.”

Trong hla kơ Teh đak tơ̆ apŭng Cư Mgar hlôi tơgop pơm hơtŏk jơhngơ̆m đon hưch hanh hơmanh bơnê kơ hơdrĕch hơdrung, pơtrŭt kơtang jơhngơ̆m đon pơting dih băl atŏk tơ iung muk drăm, jŏh ayŏ tơ̆ tơring. Ƀok Nguyễn Thiên, Kơ iĕng Kơdră chĕp pơgơ̆r Đảng apŭng Cư Mgar tơbăt:“Rim tơring, thĭ trân tơ iung pơjing trong hla kơ đơ̆ng sơnăm 2020. Mă blŭng ‘nŏh pơm tơ̆ dôm trong tơm kơ tơring, hrei ou minh ƀar tơring thĭ trân hlôi lang să trong hla kơ tơ̆ rim trong pơlei pơla, koeng kơphô̆. Pơjing trong hla kơ mĭnh păh vă pơrô̆ pơrôp ăn Hop akŏm tih kơ Đảng rim hơnih păng jei vă rơvơn hloh lơ̆m bơ̆ jang pơrô̆ pơrôp kon pơlei dôm năr Lêh tơbăt kơ teh đak.”

Dôm jăl trong ƀrông ƀrang hla kơ sơnglŏng dreng păr mơliơk hăm kial puih mak tơbăt hơdăh ăn tơdrong jơnei kơtang lơ̆m bơ̆ jang tơ iung pơjing tơring tơrang ‘nao tơ̆ Cư M’gar, Dak Lăk roi năr roi ‘lơ̆ng ,liĕm, gơ̆h hơgei.