Oh Võ Thị Như Ngọc, Bí thư Chi đoàn lăm 12A1, Hnam trương jăl pêng Lê Quí Đôn, pơlei tơm Buôn Ma Thuột, dêh char Dak Lăk ‘noh mĭnh lơ̆m dôm hŏk tro hơgei đei tơmơ̆t jang Đảng mưh ƀlep 18 sơnăm. ‘Nou jĭ tơdrong drơ̆ng tơmơ̆t tơgăl đơ̆ng hơdrin hŏk pơhrăm gơ̆h hơgei, oei sa ‘lơ̆ng đơ̆ng oh lơ̆m lơ sơnăm. Như Ngọc pơma:“Ba chhôk hơ iă dêh. ‘Nou jei jing jơ rơvơn vă oh hơdrin hloh dơ̆ng oei sa ‘lơ̆ng păng lang să tơdrong hơdrin truh hăm bôl boăl lơ̆m hnam trương”.

Găh oh Nông Quốc An, hŏk tro Hnam trương jăl pêng Võ Nguyên Giáp, apŭng Ea Kar, dêh char Dak Lăk hơnơ̆ng kơrŭn đĭ ai oei sa ‘lơ̆ng, hŏk gơ̆h hơgei tôm tong păng iung jang Đoàn tơnăp. Khei 8/2023, Nông Quốc An đei pôk tơmơ̆t jang lơ̆m khul Đảng lơ̆m mă sư tŏk bŏk oei hŏk pơhrăm lơ̆m hnam trương hloi.“Lơ̆m dôm sơnăm hŏk jăl 3, ba hơdrin iung jang rim tơdrong jang lơ̆m hnam trương. Ba tôch chhôk ‘nă mưh đei mơ̆t lơ̆m Đảng. Tơdrong mă ou ba gô hơdrin hloh dơ̆ng lơ̆m khei năr kơnh”.

Kiơ̆ kơ ƀok Nguyễn Tiến Dũng, Bí thư Chi bộ, Kơdră chĕp pơgơ̆r Hnam trương Jăl pêng Võ Nguyên Giáp, đei pơjing lơ̆m sơnăm 2021, hnam trương đei 27 đang viên. Đơ̆ng jơ ‘năr pơjing hloi, Chi ƀô̆ lăng ba kơjăp truh bơ̆ jang atŏk tơ iung đảng viên. Ưh khan lăp tơmơ̆t khul ƀok thây kô pơtho, bơngai jang, mă lei hnam trương oei lăng truh atŏk tơ iung đảng viên ‘noh hŏk tro hŏk hơgei oei sa ‘lơ̆ng. Sơnăm hŏk 2023- 2024, hnam trương tơmơ̆t đei 6 đang viên ‘nao ‘noh bơngai hok tro. Vă tơchă ƀôh, rơih dôm bơngai tơgăl, ‘ngoăih tơdrong hŏk pơhrăm, rim đe oh oei vang iung jang kơtang rim tơdrong bơ̆ jang tơpôl vă đe oh pơhrăm jơhngơ̆m đon chinh trĭ kơjăp iăp kơtang. Ƀok Nguyễn Tiến Dũng, tơbăt: “Mă kăl hloh ‘noh đơ̆ng Khul kơdră chĕp pơgơ̆r Đoàn hnam trương, lăng hơlen khei ‘năr hŏk pơhrăm, vang iung jang ou to kơ rim đe oh. Mă ƀar ‘noh đơ̆ng ƀok thây kô vei lăng lăm hŏk, rim ƀok thây kô pơtho vă trŏ lăp ăn rim đe oh gơ̆h bơ̆ jang chĕp pơgơ̆r đoàn, tơdrong jang hơdruh tơdăm. Adoi đei hŏk pơhrăm hơgei vă nhôn tơmơ̆t lơ̆m khul pơ prŏ ăn atŏk tơ iung tơmơ̆t jang lơ̆m Đảng”.

Đơ̆ng sơnăm 2020 truh dang ei, lơ̆m dêh char Dak Lăk hlôi pôk tơmơ̆t đei 368 ‘nu đảng viên ‘noh bơngai hŏk tro; hơdrô̆ sơnăm 2024 đei 200 ‘nu hŏk tro đei pôk tơmơ̆t lơ̆m Đảng. Kiơ̆ đơ̆ng ƀok Đỗ Tường Hiệp, Kơ iĕng Kơdră chĕp pơgơ̆r Hơnih vei lăng Hnam trương pơtho pơhrăm dêh char Dak Lăk, tơdrong iŏk đei hơ iă ou jing trong jang ‘lơ̆ng hơ iă vă rim hnam trương hơnơ̆ng bơ̆ jang atŏk tơ iung Đảng lơ̆m hŏk tro. Tơdrong pơm sơđơ̆ng ăn hŏk pơhrăm, adoi sơđơ̆ng ăn vang iung jang rim tơdrong jang ou to vă pơhrăm pơjing đei jơhngơ̆m đon chinh trĭ jĭ mĭnh trong tơlĕch ăn trăp trĭn hăm đe oh. Khei năr ou kơnh Hơnih vei lăng Hnam trương pơtho pơhrăm dêh char gô hơnơ̆ng iung jang hơdoi hăm rim Hơnih jang Đảng, hnam trương vă pơjing dơ̆ng tơdrong rơvơn hŏk pơhrăm ăn rim đe oh. Ƀok Đỗ Tường Hiệp, tơbăt:“Bơ̆ jang atŏk tơ iung đảng lơ̆m hnam trương đei lăng ba kơjăp. Mă kăl ‘noh lơ̆m khul hŏk tro. Dôm đoàn viên tơnăp hŏk hơgei kơ hnam trương jăl pêng gô đei pơtho pơhrăm băt hlôh ƀôh hơdăh găh chinh trĭ, jơhngơ̆m đon oei sa ‘lơ̆ng păng đei jơhngơ̆m đon hơpơi ‘meh vă kơtang găh kĕch mang păng pôk tơmơ̆t jang lơ̆m đảng vă đe oh đei trong hơdrin đơ̆ng hrôih đơ̆ng rŏng ‘noh pôk tơmơ̆t”.

Tơdrong pôk tơmơ̆t hŏk tro mơ̆t lơ̆m Đảng ưh khan jơhngơ̆m đon hưch hanh hơmanh bơnê đơ̆ng kơ dih đe oh mă oei tơƀôh hơdăh hơnăp jang đơ̆ng jơhnơr mơlôh Dak Lăk lơ̆m tơdrong jang tơ iung pơjing păng atŏk tơ iung pơlei pơla, teh đak. Dôm đảng viên sơnăm mơlôh đei pôk tơmơ̆t đơ̆ng oei hŏk pơhrăm lơ̆m hnam trương gô jing dôm bơngai ‘lơ̆ng hơ iă, gơ̆h hơgei đei jing dôm bơngai kiơ̆ yok rok jơ̆ng păng atŏk tơ iung kơ Đảng lơ̆m hơnô̆ hơnăp kơnh.