Sơnăm 2025, Đắk Lắk đei pơjao hlŏh 3.030 kơsô̆ hơgăt, lơ̆m noh đei 2.550 kơsô̆ hơgăt bơngai năm pơm ƀô đô̆i păng hlŏh 480 ‘nu bơngai năm pơm công an. Lơ̆m ‘măng rơih druh dăm năm pơm linh sơnăm 2025 âu, tơdăm Y Ra Ni Byă (bơngai Rađe) rơnĕh sơnăm 2005, tơ̆ plei Cư Phiăng, xăh Hòa Phong, apŭng Krông Bông, dêh char Đắk Lắk pơm hla ar apinh năm pơm linh.

Đơ̆ng rŏng dôm năr ngôi pơchơt têt, Y Ra Ni hlôi hơmet đang jơhngâm đon, kŭm nhen tơmam kơdih vă năm pơm linh: “Inh tôch hơiă mưh đei khul kơdră tơring pơjing tơdrong ‘lơ̆ng vă inh đei năm pơm linh. Inh vă adrin hơmet mă ‘lơ̆ng rim tơdrong mưh năm pơm linh păng vă adrin hŏk pơhrăm mă ‘lơ̆ng, jang kiơ̆ dôm tơdrong jang đơ̆ng kơpal pơjao. Mưh năm pơm linh đang inh vă brŏk tơ̆ pơlei, bơ̆ jang tơgŭm ăn unh hnam păng pơyoa ăn tơpôl, pơlei pơla”.

“Khei 3 sơlam teh đak” jĭ tơdrong jang hơnơ̆ng rim sơnăm kơ dôm anih jang Đoan – Hô̆i lơ̆m dêh char Gia Lai vă pơm hơdah tơdrong jang “Inh ‘mêm kơ teh đak inh”. Khei 3/2024, anih jang Đoan apŭng Đức Cơ hlôi jang hadoi pơgơ̆r tơdrong akŏm "Khei 3 sơlam teh đak", pơjao hnam ‘mêm kơ-eng, unh hơyuh jơ̆ng ‘năr păng jên hŏk ăn đe hơ-ioh tơ̆ tơring, atŭm hăm noh khăm hơmet jĭ asong pơgang ưh iŏk jên. Pơtoi kơ noh tơdrong jang "Sơnăm mơlôh  Gia Lai kơyươ sơlam teh đak" tơ̆ xah Ia Pnôn, apŭng Đức Cơ vă hơtŏk hlôh vao gah Lươ̆t Sơlam teh đak păng tơjủ ƀiơ̆ tơdrong tơ-oei unh om đơ̆ng ‘lơ̆ng lơ̆m đoan viên, hơdruh tơdăm.

Đoan oei hăt hot vang jang dôm tơdrong jang ‘mêm kơ-eng, pơ-‘nguaih cham rông, hnam trưng hŏk. Đoan viên Siu H’Thanh akhan, tơdrong jang âu hlôi sơkơ̆t sơnong jang dơnơm kơ Đoan hơdruh tơdăm tơgop pơlan să tơdrong tơguăt tơguăl, sơnong jang lơ̆m tơpôl:

“Ba noh tơdăm đei jơhngơ̆m pran, mă tơring âu noh tơring sơlam teh đak, ‘noh kơdih inh athei hơdrin jang plang ăn tơpôl, ăn pơlei pơla vă đei jơnei ‘lơ̆ng hăm lơ tơdrong sô̆. Kang ƀô̆ kơpal tơrĕk truh nhôn păng asong tơmam pơchơt puih mak ăn kon pơlei, chă khăm jơhngơ̆m jăn ăn kon pơlei păng asong pơgang hơmet jĭ, bơngai yơ jĭ jăn ‘noh hơmet hloi. Dang ei têt truh bơih, đe sư tơgŭm hăm xah sơlam teh âu hăm lơ tơmam kăp gĭt asong ăn, vang glơng tơnap tap ăn kơ nhôn tơ̆ âu”.