Pơma pơtôch ‘măng hop akŏm, Kơdră Quốc hội Trần Thanh Mẫn akhan ‘nâu jĭ tơdrong hơiă gĭt kăl lơ̆m tơdrong jang pơjing khôi luơ̆t, đei tơdrong tôch kơ dêh pơyua ăn tơdrong jang kach mang proh hơmet, pơm tŏ sĕt bơngai jang lơ̆m anih jang chĭnh trĭ păng tơtom hơmet pơ ‘lơ̆ng mơmat tat, tơhlăk tơhlĭn găh trong jang tơgŭm, pơm tơdrong ‘lơ̆ng vă jang đang anih jang kăl, hơtŏk jên jang, pơm hơnih hơtŏk tơiung ‘nao ăn tơring păng lơ̆m teh đak.

Tơdrong jang iŏk bơngai jang kŭm hlôi đei bơ̆jang kơjăp, kiơ̆ ƀlep tơdrong hơgăt đơ̆ng Đảng, khôi luơ̆t teh đak, iŏk đei tơdrong drơ̆ng lăp ‘lơ̆ng đơ̆ng rim bơngai tang măt Quốc hội. Kơdră Quốc hội Trần Thanh Mẫn athei Khŭl kơdră teh đak hơdrin ‘lơ̆ng hloh vă pơjing dôm trong vă jang, hla ar hơgăt hơdăh tơdrong đei pơjao lơ̆m dôm luơ̆t păng tơdrong tơchơ̆t đơ̆ng Quốc hội; dôm anih jang jăh dăr hơlen vă hơmet ming, tơmơ̆t tơdrong hơdăh lơ̆m dôm hla ar chih pơkăp khôi luơ̆t ƀơm truh proh hơmet bơngai jang kăl kơ hơmet ‘lơ̆ng hloi, mă ưh kơ gơh hơmet kiơ̆ tơdrong atŭm vă tơlĕch ăn kiơ̆ gơh kĭ ăn.