Kiơ̆ tơdrong tơchơ̆t đơ̆ng Kơdră teh đak găh hơchăng ăn brŏk hrôih sơnăm 2025, bơngai đei hơchăng ăn brŏk đơ̆ng hnam phak hrôih đei: bơngai oei phak kron kiơ̆ sơnăm hơgăt, bơngai đei phak kron truh lôch hlôi đei tơjur ming sơnăm phak, bơngai tŏk bŏk đei nơ̆r asong oei tơ̆ hnam tam mă rôp phak. Pơma tơ̆ âu, ƀok Phạm Thanh Hà, Phŏ Kơdră Anih pơvih ăn Kơdră teh đak pơma hơdăh, đơ̆ng sơnăm 2009 truh dang ei, Teh đak pơgơ̆r 10 ‘măng hơchăng brok hrôih ăn pơnă lơ̆m dôm năr lêh tih kơ teh đak, hơchăng ăn vă jê̆ 100.000 ‘nu bơngai pơm yoch hlôi hơmet ming jơhngâm đon, adrin bơ̆ jang, hŏk pơhrăm ‘lơ̆ng vih dơ̆ng hăm tơpôl.

Dôm ‘măng hơchăng brok hrôih pơm lăp hăm rim tơdrong jang chinh trĭ, khôi luơ̆t, tơdrong jang tơbôl, đei kon pơlei lơ̆m teh đak lăp đon păng tơpôl lơ̆m apŭng plenh teh tơchĕng ‘lơ̆ng; hơnơ̆ng tơƀôh hơdăh trong jang, tơdrong tơgŭm ưh đei tơplih đơ̆ng Đảng păng teh đak lơ̆m tơdrong tưk tơiung păng vei lăng tơdrong pơm tơm kơ kon bơngai hơtŏ ‘lơ̆ng, dang ăi băl ăn đĭ đăng kon pơlei, jô̆ hloi dôm bơngai oei đei rôp phak. Hăm dôm tơdrong tơchơ̆t hơchăng brŏk hrôih đơ̆ng Kơdră teh đak, dôm jĭt rơbâu ‘nu bơngai iŏk đei tơdrong chơt hơiă mưh đei asong brŏk oei xa hơdai hrôih hăm unh hnam, vă hơmet ming tơdrong arih xa.