Rơneh tơ̆ tơring pơlei dơnuh hin Ea Súp, dêh char Đắk Lắk, tơdrong hŏk pơhrăm oei lơ mơmat tat, bơngai hơdruh Mường Hoàng Thị Thu Phương hlôi yak hloh rim tơdrong pơgăn vă rong ‘me tơdrong hơpơi ‘meh. Dang ei ‘noh sinh viên sơnăm 4 hŏk găh vei lăng Bơngai jang tơ̆ Hnam trưng Đại học Lao động Xã Hội pơlei tơm Hồ Chí Minh, Phương ưh khan lăp iŏk đei jơnei hŏk pơhrăm gơh hơgei, mă oei jing bơngai jang lơ̆m khŭl bơ̆jang tơpôl tơ̆ hnam trưng đại học păng tơ̆ pơlei sư, hơnơ̆ng vang jang dôm tơdrong jang tơgŭm ‘mêm mơnat.“Bơngai jang ưh kơ gơh kơƀăh vă hơtŏk tơiung 1 teh đak, kơna oh tơchĕng gô đei 1 trong năm tôch kơ đunh đai tơ̆ rŏng âu. Ƀlă kơ ‘noh dơ̆ng oh tơchĕng jĭ kơdih kâu kŭm đei gơh vă chĕp kơ̆l dăh mă vei lăng 1 anih jang hơyơ ‘noh kơna oh hŏk tơdrong jang vei lăng bơngai jang. Oh oei ‘meh đei plang jơhngơ̆m, đei vih hăm pơlei kơdih, tơdăh đei tơdrong hiôk ‘noh oh gô vă plang jơhngơ̆m jang tơ̆ apŭng”.

H’Uyên Byă, hơdruh Ê Đê tơ̆ apŭng Krông Bông, dêh har Đắk Lắk, dang ei ‘noh jĭ sinh viên đại học tơ̆ pơlei tơm Hồ Chí Minh. Iŏk đơ̆ng sơnăm mă mônh hŏk đại học, H’ Uyên hlôi ‘măn jơ năr vang jang dôm tơdrong jang tơgŭm ‘mêm mơnat tat Pơyan he rơgoh, plang song pham ‘mêm mơnat păng dôm tơdrong jang ‘ngoăih tơ̆ hnam trưng đại học.

Tơdrong jang thim păng dôm tơdrong jang tơgŭm ‘mêm mơnat tơgŭm H’Uyên tơmơ̆t đei dơ̆ng tơdrong hlôh vao, đon lui, pơm tơdrong ‘lơ̆ng kơjăp vă kơdih kâu gơh jơnei hăm tơdrong jang đơ̆ng 1 ‘nu bơngai pơtho hŏk tơ̆ pơlei pơla kơdih.“Ƀơ̆t đei hŏk tơ̆ pơlei tơm Hồ Chí Minh, mĭnh pơlei tơm tôch kơ hơtŏk tơiung ‘noh ĭnh tơchĕng jĭ kơdih kâu gô iŏk yua dôm tơdrong hlôh vao, dôm tơdrong gơh băt mă kơdih hlôi hŏk đei vă gơh vih tơ̆ pơlei pơla kơdih, pơtho dơ̆ng dôm tơdrong hlôh vao, dôm tơdrong gơh băt ‘noh, tơroi ăn kơ hŏk tro păng tơgŭm đe oh roi kơjăp lơ̆m tơpôl mơ̆t jang hơdai nhen dang ei.”

 Oei hăm H Sian Êban, bơngai Ê Đê, oei tơ̆ apŭng Krông Păch, hơpơi ‘meh tơgŭm kon pơlei sư hlôh vao khôi luơ̆t păng dă ƀiơ̆ kơ mơmat mưh đei ƀôh tơdrong ƀơm truh khôi luơ̆t, iŏk đơ̆ng oei ‘lơ̆p sư đĭ băt hơdăh hŏk mă hơgei vă jing 1 ‘nu luật sư ‘lơ̆ng kơ pơlei pơla. Dang ei tŏk bŏk kiơ̆ hŏk sơnăm mă 3 tơ̆ Học viện Tòa án pơlei tơm Hà Nội, H Sian ưh khan lăp iŏk đei jơnei hŏk pơhrăm gơh mă oei jing 1 ‘nu bơngai ‘lơ̆ng vei hơnăp jang bơngai tơroi tơdrong jang lơ̆m dôm dôm tơdrong jang tơpôl. H’Sian khŏm vă vih tơ̆ pơlei pơla đơ̆ng rŏng hŏk đang. “Iŏk đơ̆ng blŭng vă năm hŏk ‘noh ĭnh tơroi hăm mĕ ƀă ‘noh ĭnh pă jor gô vih tơ̆ Đắk Lắk vă hơtŏk tơiung pơlei pơla. Đei lơ tơdrong tơ̆ ‘ngoăih to, mă lei rim bơngai apĭnh ‘noh tơdrong jang ‘lơ̆ng thoi noh, hơdrin hŏk pơhrăm thoi noh ‘noh hăm ‘meh oei kơtă tơ̆ âu vă hơtŏk tơiung ưh, ĭnh akhan ‘noh ưh, ĭnh gô vih tơ̆ Đắk Lắk vă hơtŏk tơiung hơdrĕch hơdrŭng nhôn”.

Dêh char Đắk Lắk đei rơbâu ‘nu sinh viên bơngai kon kông tŏk bŏk kiơ̆ hŏk tơ̆ dôm hnam trưng đại học, cao đẳng lơ̆m teh đak. Lơ̆m noh đei lơ sinh viên hlôi hơdrin yak tŏk lơ̆m hŏk pơhrăm, hơdrin vang jang dôm tơdrong jang yua kơ tơpôl lơ̆m păng ‘ngoăih hnam trưng hŏk. ‘Nâu kŭm jing dôm bơngai hơgei lơ̆m dôm tơdrong jang khŭl grŭp tơ̆ hnam trưng đại học cao đẳng kŭm nhen mưh vih hơlơ̆k tơ̆ tơring bơ̆jang.

Mŏ H’Giang Niê, Bí thư Đoàn dêh char, Kơdră Khŭl vei lăng Sinh viên Việt Nam dêh char Đắk Lắk roi tơbăt, hăm hơnăp jang đơ̆ng kơdih, khŭl jang đoàn, khŭl sinh viên ling lang pơm tơdrong hiôk vă kơ đe sinh viên, mă loi ‘noh jĭ sinh viên bơngai kon kông vang jang lơ̆m tơdrong jang đoàn, khŭl. Dôm grŭp jang “Sinh viên 5 ‘lơ̆ng” tơ̆ dôm hnam trưng  đại học đei pơjing hăm tơdrong jang păng trong jang hơiă sơng đei sinh viên vang jang. “Nhôn ‘meh lăng truh ‘noh jĭ đe buăl sinh viên athei băt kơdih, chă trong jang kơdih đei jăl trong kơ dih ‘meh năm păng nhôn vang yak hơdai kŭm đe buăl lơ̆m tơdrong pơhrăm tơdrong gơh pơma dơnuh lơ̆m tơpôl. ‘Ngoăih kơ tơdrong hŏk hlôh vao tơ̆ hnam trưng, kăl kơ đei gơh băt kơtă tơ̆ tơpôl, lơ̆m noh tơdrong gĭt kăl hloh nhôn ‘meh đe buăl băt đei akhan bơ̆n athei đei hơnăp jang lơ̆m tơdrong vei răk, hơtŏk tơdrong ‘lơ̆ng joh ayŏ joăt joe đơ̆ng rim hơdrĕch kơdih păng đơ̆ng noh đe buăl gô jing bơngai jang tơroi tơbăt ‘lơ̆ng vă păr ang dôm tơdrong ‘lơ̆ng hơiă lơ̆m tơpôl”.  

Lĕch đơ̆ng pơlei pơla, dôm sinh viên bơngai kon kông tơ̆ Đắk Lắk hlôi hơdrin hŏk pơhrăm, tơmơ̆t iŏk tơdrong hlôh vao, gơh jang tơ̆ dôm hnam trưng đại học, cao đẳng kŭm nhen tơgop jơhngơ̆m lơ̆m lơ tơdrong jang yua kơ tơpôl. Gơh hŏk hăm dôm hơnih hŏk pơhrăm ‘nao, dôm sinh viên ưh kơ đei pơdơh hŏk pơhrăm, hơdrin păng oei ling lang lăng truh pơlei pơla, hơpơi ‘meh plang jơhngơ̆m vă pơjing pơlei pơla kơdih. ‘Nâu gô jing bơngai hơgei ‘lơ̆ng tơgop bơngai jang lơ̆m tơdrong hơtŏk tơiung kơ Đắk Lắk kŭm nhen tơpôl rim hơdrĕch hơdrŭng tơ̆ hơnăp kơnh.