Kơsô̆ tơmoi truh tơmang tơ̆ dêh char Đăk Lăk lơ̆m khei pơdơh Têt Nguyên đan Ất Tỵ sơnăm âu tŏk 1,3 'măng pơtêng hăm khei năr âu sơnăm sơ̆, pơyua pơhlom 60 tih hlj. Jơ̆p dêh char hlôi sơng 180 rơbâu 'nu tơmoi truh tơmang, tŏk 24% pơtêng hăm khei năr âu sơnăm sơ̆, lơ̆m noh 98% 'noh tơmoi lơ̆m teh đak. Rim anih truh tơmang joh ayŏ, jơhnơr hơrih hơvơn lơ tơmoi truh tơmang nhen Anih Pơdă tơmam drăm so Đăk Lăk hlôi sơng 280 khul hăm kơ rơbâu 'nu tơmoi.

Dôm anih tơmang cham char, pơchơt đei đak krong, đak glung, chơkơi đak adoi đei lơ tơmoi truh tơmang cham char rơngơp 'lơ̆ng, dôm tơdrong akŏm joh ayŏ; hơlen băt tơmang pơhiơ̆ anih hli, vơ̆r thŏng, găn chơkơi đak hiơ̆r. Vei sơđơ̆ng ăn tơmoi, dôm anih jang gah tơmang pơhiơ̆ hơmet tơnăp gah trong jang, tơmam chă tơgŭm dŏng sar bar, đei bơngai hơlen lăng măng năr lơ̆m dôm năr hơdrol, lơ̆m păng đơ̆ng rŏng kơ Têt Nguyên đan. Pơm kiơ̆ ƀlep tơchơ̆t gah chih măt, pơkăp kơjă vĕ păng kơjă tĕch tơmam trŏ hăm tơchơ̆t tơlĕch, vei rơgoh 'lơ̆ng cham char.

Kơsơ̆ 2/2, Anih vei lăng kon pơlei dêh char Lâm Đồng roi tơbăt, năr Tết Nguyên đán Ất Tỵ âu, tơmoi truh tơ̆ Lâm Đồng chă tơmang lăng, pơdơh ngôi tŏk vă 36% pơting hăm khei ‘nâu sơnăm sơ̆. Lơ̆m dêh char sơng dang 380 rơbâu ‘nu tơmoi năm chă tơmang lăng, pơdơh ngôi, tŏk vă jê 36% pơting hăm năr Têt sơnăm sơ̆. Lơ̆m noh, tơmoi đơ̆ng apŭng plĕnh teh dang 27 rơbâu ‘nu, tŏk 35%; tơmoi ƀĭch pơdơh đei 270 rơbâu ‘nu, tŏk vă jê̆ 70% pơting hăm khei ‘nâu sơnăm sơ̆. Tơmoi tơmang lăng akŏm lơ đơ̆ng ‘năr 2 truh ‘năr 4 Tết.

Kăl kơ lăng truh, ƀơ̆t mă tơmoi truh tơ̆ Lâm Đồng tŏk pơting hăm khei ‘nâu sơnăm hơdrol mă lei tơmoi truh tơ̆ pơlei tơm Đà Lạt ‘noh jur. Pơlei tơm lăp sơng hloh 100 rơbâu ‘nu tơmoi tơmang lăng, jur hloh 33 rơbâu ‘nu tơmoi pơting hăm năr Tết Nguyên đán sơnăm sơ̆. Lơ̆m năr Tết Nguyên đán 2025, khŭl lĭnh kơpal dêh char Lâm Đồng pơm hla ar sek phak hloh 1.000 ‘nu pơm glăi tơ̆ trong nơnăm.