Pơrô̆ iung jang pơting dih băl lơ̆m khul Đoàn pơjing đei hơyak pran kơkuh chơt hơ iă Hop akom tih kơ Đảng rim hơnih păng Hop akŏm tih kơ Đảng lơm teh đak ‘măng mă 14, Bí thư thứ nhất Trung ương Đoàn Bùi Quang Huy pơma hơdăh:Rim hơnih Đoàn păng đĭ đăng đoàn viên, hơdruh tơdăm kơrŭn đĭ ai iung jang keh kong rim trong tơlĕch jang pơting dih băl đei: Pơrô̆ tơbăt chăl sơnăm nuih mơng gơ̆h hơgei kơ Đảng Cộng sản Việt Nam; sơkơ̆t hơdăh hơnăp jang, nuih mơng, gơh hơgei chĕp pơgơ̆r păng jơhngơ̆m iung tơjră kơ Đảng lơ̆m prăt jăl trong jang kĕch mang 95 sơnăm ou ki, tơgop lơ̆m ba teh đak yak mơ̆t pran kơjăp iăp kơtang chăl ‘nao’ chăl atŏk tơ iung kơ hơdrĕch hơdrung; kiơ̆ yok jơhngơ̆m đon pơm yŭk yŭk trong hơlou kơ hơdruh tơdăm lơ̆m tơlĕch jang rim tơdrong jang kơ hơdruh tơdăm, Pơgơ̆r tơlĕch jang pơting dih băl, iung jang, et hơtŏk rim hơnih jang ming man păng pơgơ̆r Năr Hơdruh tơdăm vang iung jang kơkuh chơt hơ iă Hop akŏm tih kơ Đảng rim hơnih, yak truh Hop akŏm tih mă 14 kơ Đảng; Tơ iung pơjing Đoàn pran kơjăp iăp kơtang, tơpă jing khul hmŏ ăn ‘lơ̆ng hơ iă kơ Đảng; Vang iung jang tơ iung pơjing păng vei lăng Đảng; tơgop kơtang lơ̆m trong pơjing Dôm tơdrong tơchơ̆t Hop akŏm tih 14 kơ Đảng. Bí thư thứ nhất Trung ương Đoàn Bùi Quang Huy pơma hơdăh:“Ban Bí thư krao hơvơn đoàn viên hơdruh tơdăm đe hơ ioh lơ̆m teh đak hăm jơhngơ̆m đon ‘lơ̆ng hơ iă kơ dih dăh iung jang dôm tơdrong jang ‘lơ̆ng hơ iă ăn tơpôl vă tơgop pơjing đei jơ ‘năr pơting dih băl lơ̆m rim hơnih đoàn. Lơ̆m jơ ‘năr chơt hơ iă kơ năr Lêh tơlĕch jang pơting dih băl lơ̆m khul Đoàn vă kơkuh chơt hơ iă iŏk đei jơnei Hop akŏm tih kơ Đảng rim hơnih, lơ̆m hơgăt teh “Hơnih tơm iung tơjră”, bơ̆n vang iung jang hloi mĭnh tơdrong jang gĭt kăl ‘noh tơlĕch jang Têt pơtăm ‘long ling ang ƀlŏk hơdơ̆r kơ Ƀok Hô. Tơdrong jang ou hlôi jing tơdrong jang joăt joe, tơbăt hơdăh jơhngơ̆m đon yŭk trong hơlou kơ khul mơlôh Việt Nam, kơ khul Đoàn Hơdruh tơdăm Cộng sản Hồ Chí Minh lơ̆m vei lăng cham char, iung tơjră tang găn hăm tơplih tŏ ‘mi kial”.

Iung pơma tơ̆ jơ pơm lêh, ƀok Đỗ Văn Chiến, Kơdră chĕp pơgơ̆r Hơnih jang Trung ương Mặt trận tổ quốc Việt Nam hôn bơnê kơtang kơ Trung ương Đoàn hlôi tơlĕch jang tơtom pơgơ̆r iung jang pơting dih băl lăng truh Hop akŏm tih kơ Đảng rim hơnih păng Hop akom tih kơ Đảng lơ̆m Teh đak ‘măng mă 14. Vă ‘măng pơting dih băl iŏk đei jơnei tơpă, lang să kơtang jơhngơ̆m đon pơm jŭk yŭk trong hơlou kơ khul mơlôh, ƀok Đỗ Văn Chiến athei: “Trung ương Đoàn kăl lăng truh atŏk kơtang bơ̆ jang pơrô̆ pơrôp, pơm hơtŏk jơhngơ̆m đon lơ̆m rim hơnih jang Đoàn, đoàn viên, pơm lơ liơ tơdrong pơting dih băl đei jing tơdrong pơgơ̆r chinh trĭ lang să kơtang lơ̆m khul Đoàn, đei vang iung jang kơtang đơ̆ng kơdrơ̆m đoàn viên, hơdruh tơdăm, đe hơ ioh lơ̆m teh đak păng pơjing đei tơdrong ‘lơ̆ng lơ̆m tơpôl; ‘noh dôm tŏ gơng, trong  nơnăm, hơnih mong răk kơsơ̆p hla bơar, lăm hŏk, dăh mă dôm tơdrong tơchăr khoa hŏk, dôm trong tơchăr pơjing tơdrong jang, trong choh jang sa hơgei, đei iŏk yua kơjăp kơ yuơ hơdruh tơdăm pơm tơ-‘ngla”.

Pơma hơdăh găh tơdrong pơtăm ‘long ưh khan tơdrong jang ‘lơ̆ng vă hơmet pơ ‘lơ̆ng cham char, mă oei tơgop lơ̆m atŏk tơ iung kơjăp ‘lơ̆ng kơ teh đak păng iung jang kiơ̆ nơ̆r pơkăp đơ̆ng Khul kơdră Việt Nam tơ̆ rim ‘măng hop akŏm apŭng plĕnh teh, lơ̆m ou đei trong tơlĕch jang pơm tơjur ‘mê̆ ‘mach truh 0 lơ̆m sơnăm 2025, ƀok Đỗ Văn Chiến athei đĭ đăng rim Hơnih Đoàn, đoàn viên hơdruh tơdăm lơ̆m teh đak dăh atŏk kơtang jơhngơ̆m đon pơm jŭk yŭk trong hơlou, tơchăr păng iung jang kơtang hloh dơ̆ng vă jang kiơ̆ jơnei rim trong tơlĕch jang pơting dih băl hlôi tơlĕch ăn.

Tơ̆ jơ pơm lêh, rim kơdră tang măt hlôi năm ngôi, pôk tơmam drăm ăn yă mĕ Việt Nam nuih mơng; pôk ăn 40 tơnô̆ tơmam drăm ăn ŭnh hnam đei iŏk yua ăn teh đak; 30 tơnô̆ kon jên hŏk pơhrăm ăn hŏk tro ŭnh hnam dơnuh hŏk hơgei; 10 tơnô̆ tơmam drăm ăn kră pơlei, kơdră chĕp pơgơ̆r pơlei apung Sơn Dương, dêh char Tuyên Quang hăm kơjă kơjên hloh 100 triu hlak jên.

Lơ̆m tơdrong pơgơ̆r, Trung ương Đoàn Hơdruh tơdăm Cộng sản Hồ Chí Minh tơlĕch jang tơdrong jang hơdruh tơdăm kơkuh chơt hơ iă Hop akom tih kơ Đảng ‘măng mă 14 đei: 15 pơbŭng hnam ăn hơdruh tơdăm ƀơm răm đơ̆ng kial hơbŭt hơbông pơrăm; 2 pơbŭng hnam hơnŭk hơnoa, cham đă ƀŏng long tơplŏng kơdou pơlei pơla, pơbŭng hnam Khăn quàng đỏ, Pơgar ‘long pơtăm hơdruh tơdăm, jăl trong pơlei pơla, cham pơchơt pơ hiơ̆ ăn hơ ioh, Pơbŭng hnam 26/3, 36 jăl trong hơdăh ang rang ‘lơ̆ng ŭnh hơyuh jơ̆ng ‘năr, 20ha bri ‘long hơdruh tơdăm, tơgŭm 13 ti hlak jên đơ̆ng kon jên tŏk iŏk đơ̆ng Hơnih mong jên Teh đak găh tơdrong pơm kênh Trung ương Đoàn. Akŏp kon jên tơlĕch jang hloh 21 ti hlak jên.

Lăp đơ̆ng rŏng pơm lêh pơrô̆ jang, rim kơdră chĕp pơgơ̆r Đảng, Teh đak atŭm hăm rim kơdră tang măt, đoàn viên hơdruh tơdăm păng kon pơlei lơ̆m tơring vang iung jang pơtăm ‘long tơ̆ Hơnih tơbăt ăn rim Ƀok yă kĕch mang sơ̆, Hơnih Gru gra gĭt kăl dăr sơnăm teh đak Tân Trào, apŭng Sơn Dương, dêh char Tuyên Quang.