Kiơ̆ tơdrong tơchơ̆t kơsô̆ 1193 đơ̆ng Anih chĕp kơ̆l pơgơ̆r Quốc hội găh tơdrong hơmet ming anih jang hanh chĭnh tơ̆ xăh kơ dêh char Đắk Lắk đơ̆ng 2023 – 2025, thĭ xăh Buôn Hồ, dêh char Đắk Lắk đei tơdrong tơplih, tơmât hơdai hlŏh 30km2 teh păng vă jê̆ 3.500 ‘nu kon pơlei đơ̆ng xăh Ea Blang mât lơ̆m 2 xăh ‘nŏh Ea Siên păng Ea Drông.

Vă tơgŭm ăn kon pơlei pơm ming hla ar đơ̆ng rŏng kơ tơmât hơdai xăh hrĕnh ‘lơ̆ng, anih jang kơpal hlôi jur truh tơ̆ xăh vă pơm ming hla ar kăn kươk kon pơlei păng ƀơk ming Hla ar teh; lơ̆m noh mă lơ ‘nŏh jĭ pơm hla ar teh, anih oei kơ kon pơlei. Tơplih ăn nôp hla ar tơ̆ anih pơma hla ar kơ thĭ xăh, kon pơlei lăp kăl nôp hô sơ păng iŏk hla ar tơ̆ Hnam hŏk hôp tơpôl kơ xăh Ea Drông hloi. Trong jang ‘nâu hlôi pơm ‘lơ̆ng ăn tơdrong pơvih pơvăn, pơm hla ar, hơtŏk tơdrong đei yoa mưh pơm hla ar vei lăng, pơjing tơdrong hiôk hian ăn kon pơlei. Tơchĕng adrol, lăp lơ̆m 1 giĕng đĕch, dôm hla ar tơplih ming âu gô đei pơm đang.