Ƀlep ƀât tơbăt 94 sơnăm năr pơjing Khul druh dăm Cộng sản Hồ Chí Minh (26/3), Thủ tướng Phạm Minh Chính ‘nao đei jơ tơƀâp, pơma nuh hăm đe druh dăm đei hơnăn “Druh dăm Việt Nam năm hơdrol atŏk tơiung khoa hŏk kơmăy kơmŏk, tơplih ‘nao rơgei păng tơplih hăm kơmăy sô̆”. Tơ̆ jơ pơma nuh, Thủ tướng Phạm Minh Chính păng kơdră chĕp kơ̆l dôm anih tơm, anih jang kơpal vang tơl tơblang lơ nơ̆r apinh đơ̆ng druh dăm găh lơ tơdrong gĭt kăl, đei: Iung jang xa rơgei; atŏk tơiung khoa hŏk kăl; tưk tơiung khul bơngai jang rơgei, mă loi ‘nŏh jĭ dôm tơdrong jang găh kơmăy kơmŏk ‘nao; trong sơng iŏk păng gơ̆t jang bơngai rơgei.

Thủ tướng athei Druh dăm Việt Nam tưk tơiung jơhngâm đon năm hơdrol, gơ̆h hơgei hăm "5 kơchăng" lơ̆m tơdrong atŏk tơiung khoa hŏk kơmăy kơmŏk, tơplih ‘nao rơgei păng tơplih hăm kơmăy sô̆ kơ teh đak; Kơchăng hŏk pơhrăm, tơchĕng hơlen khoa hŏk, iŏk yoa kơmăy kơmŏk, tơplih hăm kơmăy sô̆; Kơchăng vang hơmet pơ ‘lơ̆ng trong chĕp kơ̆l pơgơ̆r, hơmet pơ ‘lơ̆ng anih tơmât jên jang xa, tĕch mơdro; Kơchăng vei lăng mă rơgei ‘lơ̆ng păng đei yoa mưh bơ̆ jang; Kơchăng iung jang xa, tơplih ‘nao rơgei, tơplih hăm kơmăy sô̆; Kơchăng lơ̆m tơdrong pơvei, mât hơdai hăm apŭng plenh teh.