Thủ tướng akhan, anih mong jên jĭ huan pham kơ tơdrong jang mŭk đrăm, huan pham mă ưh kơ ro ‘nŏh trong jang găh jên hu ưh ‘lơ̆ng, trong jang jên hu ưh ‘lơ̆ng gô ƀơm kơnê̆ truh tơdrong jang mŭk drăm lơ̆m teh đak, truh tơdrong jang tŏk. Sơnăm 2025 jĭ sơnăm đei lơ tơdrong gĭt kăl, jĭ sơnăm vă jang tŏk pran, athei adrin jang tŏk GDP tŏ sĕt hlŏh ‘nŏh 8%.

Thủ tướng athei hơnơ̆ng tưk tơiung dôm tơdrong jang tŏk đơ̆ng adrol sơ̆ ‘nŏh jĭ tĕch mơdro tơ̆ teh đak đe, răt yoa tơmam păng tơmât jên jang; athei dôm anih jang akŏm jơhngâm tơchĕng hơlen dơ̆ng dôm kơsô̆ jên asong tŏk iŏk hăm dôm bơngai oei mơlôh kăl đei hnam oei. Hăm trong jang: Mŭk mam pơtơm đei đơ̆ng đon tơchĕng păng trong vă jang, đon adrin pơtơm đei đơ̆ng tơdrong tơplih ‘nao păng gơ̆h hơgei, jơhngâm pran pơtơm đei đơ̆ng kon pơlei păng anih tĕch mơdro, Thủ tướng athei iŏk tơdrong pran đơ̆ng anih mong jên vă tưk tơiung, iŏk yoa dôm tơdrong ‘lơ̆ng đei hơdrô̆, dôm tơdrong ‘lơ̆ng đei kơsưk pơjei pran, pơjing jơhngâm pran ‘nao lơ̆m tơdrong jang tŏk teh đak.