Đơ̆ng rŏng mơ̆ng rim nơ̆r pơma, Pơma pơtôch hop akŏm, Thủ tướng Phạm Minh Chính akhan, bơ̆n athei druh kiơ̆ tom hăm rim tơdrong lơ̆m apŭng plenh teh păng lơ̆m teh đak vă tưk tơiung tơdrong pran ‘lơ̆ng păng găn ƀiơ̆ dôm tơdrong krê. Thủ tướng pơma hơdăh, Đảng, Teh đak tơlĕch đon pơhnŏng tôch hơdăh hăm tơdrong atŏk tơiung dôm anih tĕch mơdro Việt Nam. Đei trong tơgŭm, pơjing tơdrong ‘lơ̆ng ăn anih tĕch mơdro iĕ păng păh lăp pơih xă tơdrong jang xa, hơtŏk kơsư̆k pơjei, jơhngâm jang xa, tưk tơiung trong tĕch mơdro kiơ̆ đơ̆ng tơplih ‘nao rơgei, iŏk yoa khoa hŏk kơmăy kơmŏk, jang mŭk drăm kơsô̆, mŭk drăm hơdai, mŭk drăm rơgŏh, vei lăng cham char, tơjră hăm tŏ ‘mi kial tơplih.

Thủ tướng athei dôm Anih tơm, anih jang kơpal hơnơ̆ng hơlen năng, hơmet pơ ‘lơ̆ng trong pơgơ̆r jang. Athei hŭt lê̆ dôm tơdrong pơm hla ar pơmat tat, hơtŏk jên ăn kon pơlei jang xa. Tưk tơiung anih jang, trong nơnăm vă pơvih ăn kon pơlei, anih tĕch mơdro. Kŭm hăm ‘nŏh jĭ pơtho khul bơngai jang rơgei vă hơtŏk tơdrong đei yoa mưh jang xa ăn anih tĕch mơdro iĕ păng păh lăp.