Thủ tướng tơchĕng ‘lơ̆ng, pôk pơ ư tơdrong adrin đơ̆ng đe ƀok Kơdră chĕp kơ̆l, anih jang đảng, khul kơdră tơring, khul linh păng kon pơlei dêh char Bình Dương păng dôm tơdrong jơnei gĭt kăl hlôi iŏk đei, tơgop gĭt kăl lơ̆m tơdrong jơnei atŭm kơ teh đak. Găh tơdrong jang, trong vă jang tơm tơ̆ hơnăp kơnh, Thủ tướng athei Bình Dương jang tŏk mă pran hlŏh dơ̆ng găh rim tơdrong. Jăh chih pơjing, hơmet pơkĕh tơdrong vă Tơproh trong jang; chih hơdăh dôm tơdrong tơm, khei ‘năr bơ̆ jang păng jên tơmam vă bơ̆ jang dôm tơdrong jang lơ̆m Tơdrong Tơproh trong jang, mă loi jĭ hăm dôm tơdrong vă jang gĭt kăl.

Hơtŏk hrĕnh tơdrong tơlĕch jên jang đơ̆ng teh đak, mă loi hăm dôm tơdrong jang tih, gĭt kăl; hơnơ̆ng hơtŏk tơdrong jang hơdoi kiơ̆ trong teh đak – anih jang kơdih; sơng iŏk jên tơmât jang đơ̆ng teh đak đe. Thủ tướng athei Bình Dương, năm hơdrol lơ̆m tơdrong man hnam oei tơpôl, pơjing tơdrong ‘lơ̆ng ăn bơngai jang răt, thuê hnam; bơ̆ jang đei yoa ‘lơ̆ng tơdrong vei sơđơ̆ng tơdrong arih xa tơpôl, pơm ‘lơ̆ng ăn dôm tơdrong tơgŭm lơ̆m tơpôl.