Thủ tướng Phạm Minh Chính gơih nơ̆r hmach chơt hơiă truh đĭ đăng khŭl pơtho pơhrăm păng khŭl đă ƀŏng lŏng  teh đak Việt Nam đơ̆ng rŏng kơ đă sa lơ̆m ‘măng pơtôch đă ƀlŭng păng đă hơlơ̆k dơ̆ng. Thủ tướng tơƀôh đon chhôk ‘nă, bơnê kơ Khŭl đă ƀŏng hlôi hơdrin pơlong pơjei tôch bơneh, mĭnh jơhngơ̆m đon, ưh kơ đei pơdơh; Pơma hơdăh, jơnei âu ưh khan lăp tơdrong chhôk ‘nă kơ đă ƀŏng lŏng tơplŏng kơdâu Việt Nam mă oei jing hơiă ăn đĭ đăng hơdrĕch hơdrŭng, tơƀôh tơdrong hơ pơi ‘meh yak tŏk păng iŏk đei dôm jơnei ‘lơ̆ng ‘nao.

Thủ tướng gơih nơ̆r ƀlŏk bơnê gĭt kăl truh khŭl pơtho pơhrăm, khŭl tơgŭm, dôm bơngai vang yak hơdai hăm khŭl đă. Thủ tướng bơnê kơ triệu ‘nu bơngai hưch hanh kơ đă ƀŏng lŏng lơ̆m teh đak hlôi ling lang yak hơdai păng jing hơnih gơning kơjăp đơ̆ng khŭl đă ƀŏng lŏng lơ̆m prăt jăl trong iŏk đei jơnei kơ jung hloh đơ̆ng đă ƀŏng lŏng tơring.

Rơbâu ‘nu bơngai lăng đă ƀŏng lŏng Việt Nam đei măt tơ̆ sân đă ƀŏng lŏng teh đak Thái Lan Rajamangla tơ̆ anih tơm Bangkok gơmăng hei 5/1 čhôk ‘nă pă băt dang yơ mưh Khul Việt Nam đă xa Thái Lan vă iŏk đei kŭp ASEAN CUP 2024. Bơngai năng đă ƀŏng lŏng hơnơ̆ng krao tơgĕch “Việt Nam xa như̆k” păng vang hơri ƀai “Như có Bác Hồ trong ngày vui đại thắng”. 

Lơ bơngai lơ̆m teh đak kŭm dui băl lĕch tơ̆ trong hơiă hăm tơdrong đă xa đơ̆ng khul bơ̆n. ‘Nâu jĭ kŭp xa như̆k mă 3 đơ̆ng khul VN tơ̆ tơdrong thi đă ƀŏng lŏng âu. Tơdrong hơiă kơ đă xa đe kŭm đei tơ̆ jơ̆p tơring Tây Nguyên. Tơ̆ anih tơƀưh 6 tŏ trong ƀât tŏk bŏk plt Buôn Ma Thuột, dêh char Đắk Lắk, rơbâu ‘nu bơngai truh akŏm, ty chĕp hla kơ, vang hơri ƀai “Như có Bác Hồ trong ngày vui đại thắng”. Đĭ đăng bơngai vang hơri hơdai, čhôk ‘nă, hơdai hăm prăh pơđông kơmlăi pơkao ƀrŭng ƀrăng tơ̆ kơpal plenh.