Thủ tướng hơlen, đơ̆ng rŏng 76 sơnăm năr pơjing păng atŏk tơ iung, Học viện Quân y hlôi sơkơ̆t hơdăh hơnăp jang ‘noh mĭnh lơ̆m dôm Hnam trương Đăi hŏk pơtho tơdrong jang pơgang tơm dơnơm, mă kăl pơtho pơjing đei ƀok thây pơgang hơgei, chă tơchĕng hơlen pơjing đei pơgang khul ƀô̆ đô̆i, pơtho tơbăt kih thuơ̆t jang pơgang păng hơnih tơm ming hơmet gơ̆h hơgei. Rim jơhnơr ƀok thây kô păng hŏk tro Học viện Quân y hlôi pơm hơdăh ang rang ‘lơ̆ng ăn hơnih jang Pơgang khul Ƀô̆ đô̆i adoi nhen tơdrong jang pơgang kơ Teh đak. Thủ tướng pơma hơdăh, khei năr kơnh, Học viện Quân y kăl hơnơ̆ng atŏk tơ iung hloh dơ̆ng hăm hơnăp jang ‘noh mĭnh lơ̆m dôm hnam trương Đăi hŏk pơtho pơhrăm jang pơgang tơm dơnơm kơ Việt Nam, jĭ mĭnh Hnam trương Đăi hŏk kăl hloh kơ Teh đak; jing hơnih tơm pơtho pơhrăm, tơchăr khoa hŏk, atŏk tơ iung păng jang kiơ̆ rim kih thuơ̆t gơ̆h hơgei lơ̆m rim tơdrong jang pơgang khul ƀô̆ đô̆i păng tơdrong jang pơgang atŭm kơ teh đak păng apŭng plenh teh.