Khei năr ou ki, tơgoăt tơgoăl chinh trĭ, tơbôl Việt Nam-Lào hơnơ̆ng atŏk tơ iung ‘lơ̆ng hơ iă, tơklep dih băl kơjăp, lui yom dih băl kơtang; ƀar păh hlôi pơgơ̆r jơnei ‘Măng hop akom mă 46 Hơnih bơ̆ jang hơdoi Khul kơdră Việt Nam - Lào (7/1/2024) păng ‘Măng tơƀơ̆p joăt joe ƀar Đảng sơ năm 2024 (26/2/2024); iung jang kơtang rim ‘măng năm ngôi dih băl kơ khul kơdră kơpal păng rim hơnih jang. Việt Nam hrei ou đei 241 tơdrong vă jang tơmơ̆t jên jang tơ̆ Lào hăm akŏp kon jên jang hloh 5 ti 500 triu USD, hơnơ̆ng vei kơjăp hơnih dơ̆ng mă 3 lơ̆m rim teh đak (dơ̆ng đơ̆ng rŏng Trung Quốc, Thái Lan). Tĕch mơdro dih băl iŏk đei kơ Việt Nam - Lào 10 khei kơ sơnăm 2024 ‘noh 1 ti 700 triu USD (tŏk hloh 28% pơtêng hăm dôm khei ou sơnăm 2023). Ƀar păh iung jang hơdoi kơjăp, tơgŭm djru dih băl tơ̆ rim ‘măng hop akŏm lơ̆m tơring păng apŭng plĕnh teh; mă kăl lơ̆m khul ASEAN, Liên Hợp Quốc păng rim trong jang tơring. Lơ̆m sơnăm 2024, Việt Nam hlôi tơgum djru kơtang Lào iŏk jang keh đang rim hơnăp jang apŭng plĕnh teh nhen Kơdră chĕp pơgơ̆r ASEAN 2024, Kơdră chĕp pơgơ̆r AIPA 45.