'Măng năm tơmang đơ̆ng ƀok Thủ tướng Phạm Minh Chính truh Ba Lan jĭ kăp gĭt hăm tơdrong jang tơbôl kơ  2 teh đak lơ̆m khei năr truh; jĭ trong hiôk vă rim kơdră kơpal kơ Việt Nam păng Ba Lan tơƀơ̆p, pơma đam kơtă gah dôm tơdrong kăp gĭt, đơ̆ng 'noh pơjing đon lui păng hlôh vao dih băl, pơm kiơ̆ pơkăp lơ̆m tơdrong vei sơđơ̆ng păng hơtŏk jang tơbôl đunh đai păng kơjăp sơđơ̆ng.

Atŭm hăm noh, pơm hơtŏk đon lui gah chĭnh trĭ, hơtŏk dôm tơdrong jang hadoi juăt jue nhen jang mŭk drăm, tĕch pơdro, asong jang, pơtho pơhrăm, pơtho bơngai jang, tŏk kiơ̆ minh jăl jang 'nao, pơtrŏ hăm tơdrong kăl hơtŏk tơ-iung kơ rim teh đak; hơtŏk jang hadoi gah dôm tơdrong jang pran nhen jang khua hŏk kơmăi kơmŏk 'nao, tơroi tơbăt, pơm pơgang păng tơplih 'nao gơh hơgei.