2 ‘nu Thủ tướng chă dăr lăng, mơ̆ng nơ̆r tơroi găh Đại Trung Môn, Khuê Văn Các, hnam tih Đại Thành, dôm kơƀang chih măt đe Tiến sĩ, Ƀok thây tôch rơgei Chu Văn An... 2 Thủ tướng vang mơ̆ng lăng hơri quan họ - 1 boa hơri tôch hơiă tơ̆ tơring teh Đak krong Hồng, đei UNESCO chih tơbăt jĭ tơmam joh ayŏ gĭt kăl kơ kon bơngai.

Thủ tướng Phạm Minh Chính tơroi ăn Thủ tướng New Zealand găh jơhnơr arih đơ̆ng Văn Miếu - Quốc Tử Giám, hnam trưng đăi hŏk mă blŭng kơ Việt Nam đei pơjing đơ̆ng vă jê̆ 1.000 sơnăm adrol sơ̆. Mă loi, Thủ tướng pơma hơdăh tơdrong juăt pơnam hŏk, băt kŭp yom kơ bơngai pơtho đơ̆ng hơdrĕch Việt Nam; ăn tơbăt, hrei ‘nâu, Đảng, Teh đak Việt Nam hơnơ̆ng chih hơdăh pơtho pơhrăm jĭ trong jang tơm dơnơm. Thủ tướng New Zaeland tơƀôh đon hơiă yoa hăm tơdrong pơnam hŏk đơ̆ng Việt Nam, lơ̆m noh Văn Miếu - Quốc Tử Giám jĭ anih oei ‘măn răk, chĕp vei pôk pơ ư jơhngâm đon adrin hŏk, tơƀôh hơdăh kơjă kăp gĭt đơ̆ng sư.