Thủ tướng pơma hơdăh, tơdrong tang găn pơhuach kư̆ kă hơnơ̆ng đei Đảng, Teh đak tơrek truh, mă loi ‘nŏh kơplăh dang ei, ƀât mă teh đak oei dơ̆ng ƀât hơnăp lơ tơdrong ‘lơ̆ng vă yak mât lơ̆m chăl jang tŏk ‘nao kơ hơdrĕch hơdrung. Khul kơdră teh đak pơjing Anih pơgơ̆r tang găn pơhuach kư̆ kă hăm bơngai jang ‘nŏh jĭ Kơdră chĕp kơ̆l đĭ đăng Anih tơm, anih jang kơpal vă sek tơlang pơđĭ rim tơdrong tơhlăk găn trong, pơm tơlĕch lơ tơdrong hiong răm găh jên hu, tơmam drăm, pơm tơplih ‘lơ̆ng, bơ̆jang pran kơjăp hăm tơdrong ‘nâu.

Thủ tướng pơma hơdăh, hop akŏm mă blŭng âu vă kŭm hăm băl hơlen năng dôm tơdrong jang hlôi đei tơlĕch, dôm tơdrong hlôi iok đei, dôm tơdrong oei pơmat tat, tam mă pran ‘lơ̆ng păng kơlih yoa kiơ, chih iŏk dôm ƀai hŏk kăl vă tơlĕch bơ̆ jang tơ̆ hơnăp kơnh; kăl hlŏh ‘nŏh hơmet pơ ‘lơ̆ng dôm tơdrong pơmat tat, tơhlăk tăk đei đunh đơ̆ng sơ̆ vă jăh đei trong tơlĕch jên jang pơ ‘nhŏ ăn tơdrong jang tŏk mŭk drăm.