Drơ̆m kơsơ̆ 5/3, Bí thư Đảng Khŭl kơdră teh đak,Thủ tướng Phạm Minh Chính pơgơ̆r Hop akŏm kơ Anih jang Đảng Khŭl kơdră teh đak tơlĕch jang tơchĕng hơlen, set hơlen, tơlĕch trong tơmơ̆t hơdai 1,2 anih jang tơ̆ dêh char, ưh kơ pơgơ̆r tơ̆ apŭng, tơmơ̆t hơdai 1,2 anih jang tơ̆ xăh, kiơ̆ Hla ar tơchơ̆t kơsô̆ 127 đơ̆ng Anih tơm Chĭnh trĭ, Ban Bí thư găh tơlĕch jang tơchĕng hơlen, athei hơnơ̆ng proh hơmet khŭl jang kơ anih jang chĭnh trĭ. Đơ̆ng rŏng kơ mơ̆ng hla ar chih ming tơdrong jang păng Anih jang Đảng pơma dơnuh găh trong jang tơmơ̆t hơdai 1,2 anih jang tơ̆ dêh char, tơ̆ xăh, pơtôch Hop akŏm, Thủ tướng Phạm Minh Chính pơma hơdăh, tơdrong tơmơ̆t hơdai 1,2 anih jang tơ̆ dêh char, ưh kơ pơgơ̆r tơ̆ apŭng, tơmơ̆t hơdai 1,2 anih jang tơ̆ xăh athei jang kiơ̆ Hla ar tơchơ̆t kơsô̆ 127 đơ̆ng Anih tơm Chĭnh trĭ, Ban Bí thư.

Thoi noh, pơgơ̆r khŭl kơdră tơring truh âu kơnh ‘noh đei 2 jăl ‘noh tơ̆ dêh char păng tơ̆ tơring. Thủ tướng teh đak tơ tă tơdrong tơmơ̆t hơdai dôm anih bơ̆jang tơ̆ dêh char păng tơ̆ xăh ưh khan lăp vei sơđơ̆ng dôm tơdrong kăl, tơdrong hơgăt, pơkăp ‘lơ̆ng găh hơgăt teh, kơsô̆ kon pơlei mă oei athei vei sơđơ̆ng tơdrong hơdrô̆ găh groi teh, mŭk drăm, jơhnơr hơrih, joh ayŏ păng đei tơdrong tơgŭm ăn băl.