Pơgê năr 14/1, tơ̆ Hà Nội, Thủ tướng Phạm Minh Chính pơgơ̆r tơdrong Hop akŏm mă 5 Jơnŭm pơgơ̆r jang tơring Tơmăn đak krong Hồng. Kiơ̆ tơroi, sơnăm 2024, mŭk drăm – tơpôl kơ tơring tơmăn đak krong Hồng pơtoi hơtŏk pran, hơnơ̆ng yuk hơlâu lơ̆m tơdrong jang tơplih gah hơtŏk tơ-iung; hơtŏk mŭk drăm hơtŭm kơ jơ̆p teh đak păng hloh kơ tơring Đông Nam bộ; pơtoi chĕp kơ̆l gah tơmơ̆t lơ̆m jên mong kơ teh đak, tĕch tơmam ăn teh đak đe, hơvơn asong jang đơ̆ng teh đak đe. Pơma ah hop akŏm, Thủ tướng teh đak bơ̆n Phạm Minh Chính ră hơdah, khei năr truh, tơring Tơmăn đak krong Hồng athei hơtŏk 2 kơsô̆ vă atŭm hăm jơ̆p teh đak yak ah chăl sơnăm hơtŏk tơ-iung 'nao nhen tơchơ̆t đơ̆ng Ƀok Tổng Bí thư Tô Lâm.

Kơyuơ noh, Jơnŭm jang akŏm sơkơ̆t dôm tơdrong hlôi jang đei, tam mă jang đei, chă hơlen tơblang tơdrong tơm, ƀai hŏk băt hơdah đơ̆ng dôm jăl pơgơ̆r kơ dôm anih jang, rim tơring; đơ̆ng noh iŏk yua dôm tơdrong hlôi jang đei, hơmet dôm tơdrong tơnap tap, tơhlăk tơhlĭn, chă trong pơklaih. Thủ tướng pơgơ̆r athei hơdrin hloh dơ̆ng, pơm jang athei kơjăp hloh, dơnơm hloh, jang tơdrong kiơ athei mă keh tơdrong noh.