Tơ̆ hop akŏm, dôm bơngai tang măt akŏm pơma nuh tôch tơpăt găh 1,2 tơdrong ƀơm truh tơdrong hơgăt man hnam oei lơ̆m tơpôl pơjao ăn dôm tơring jang; trong pơgơ̆r jang, tơdrong tơgŭm, hơmet pơ ‘lơ̆ng dôm tơdrong tơhlăk tăk; trong mong akŏm jên, tơmam; čhơ̆ hnam vă man, pơm hla ar…Pơma tơ̆ hop akŏm, Thủ tướng Phạm Minh Chính ăn tơbăt, trong jang đơ̆ng Đảng, Teh đak tôch hơdăh ‘nŏh jĭ atŏk tơiung hrĕnh mă lei kơjăp ‘lơ̆ng, ưh đei jang hăt hot, hŭt lê̆ tơdrong hơtŏ băl, hut lê̆ tơdrong vei sơđơ̆ng arih xa tơpôl vă druh kiơ̆ tơdrong jang tŏk hơdrô̆ mŭk drăm.

Thủ tướng pơma hơdăh, athei pơ ‘nhŏ hnam oei lơ̆m tơpôl adrol đang kơ ‘nŏh truh hnam vă tĕch mơdro hmă. Hnam oei lơ̆m tơpôl athei đei tơmât jên man hrơ̆ch ‘lơ̆ng bơ̆n trong, anih jang pơgang, anih pơtho pơhrăm, tơplŏng kơdâu, tơpôl, cham char…nhen hnam hmă nai, mă lei sư lăp pha ƀiơ̆ ‘nŏh đei trong tơgŭm ăn bơngai răt. Thủ tướng pơma tơƀôh 1,2 trong jang hlôi păng tŏk bŏk tơlĕch nhen pơjing tơring pơm hnam kơ teh đak; tơlĕch jên asong tŏk iŏk truh 140 rơbâu tih hlak jên ăn hnam oei tơpôl.