Đơ̆ng rŏng kơ mơ̆ng dôm nơ̆r tơgop tơ̆ hop akŏm, pơma pơtôch jơ hôp Thủ tướng Phạm Minh Chính pơma hơdăh, tơdrong tơlĕch jang dôm tơdrong jang tih, gĭt kăl tơ̆ anih vei lăng trong nơnăm vang tơgop ‘lơ̆ng ăn tơdrong jang tŏk kơ teh đak yoa thoi nŏh athei akŏm jơhngâm chĕp kơ̆l pơgơ̆r vă jang tŏk hai, chă tơdrong jang xa ăn kon pơlei hai, vang tơgop tơlĕch ‘lơ̆ng jên jang, pơm hơtŏk kơjă kăp gĭt đơ̆ng teh, pơjing tơdrong ‘lơ̆ng vă jang tŏk tơ̆ dôm tơring.

Thủ tướng athei dôm tơring, mă loi jĭ plt Hồ Chí Minh păng dôm dêh char Bình Dương, Đồng Nai, Long An jang hơdoi hăm Anih tơm vei lăng jên hu vă hơtŏk hrĕnh tơdrong hơlen năng hla ar chih tơroi găh tơdrong đei yoa đơ̆ng Tơdrong jang pơm Trong ver 4 plt Hồ Chí Minh; Dêh char Bình Phước, Đắk Nông hơtŏk hrĕnh tơdrong pơm, kĭ hla ar tơlĕch jang tơdrong jang pơm trong gre kơdâu hrĕnh Gia Nghĩa - Chơn Thành vă tơlĕch jang ƀlep ƀât ‘năr 30/4/2025… Dôm tơ ‘ngla tơmât jên jang hơlen năng dơ̆ng jên jang vă tơtom pơtruh dơ̆ng jên jang, dôm tơdrong jang đei tơlĕch lơ̆m sơnăm 2025 Anih tơm vei lăng jên hu athei tơlĕch tôm jên ăn dôm tơdrong jang.