Tơ̆ jơ pơma đam, 2 pah drơ̆ng nơ̆r pơtoi hơtŏk tơdrong pơma đam, hơmet đon lui gah chĭnh trĭ, akŏm pơma đam đe kơdră kơpal lơ̆m lơ trong jang, pơm trong jang hadoi 2 pah hơtŏk tôm tơdrong, mă kăl noh lơ̆m tơdrong jang mŭk drăm tĕch pơdro, asong jang, jang unh hơyuh – đak dâu hơyuh soh, pơtho pơhăm, joh ayŏ, tơmang pơhiơ̆, khua hŏk – kŏng ngê̆ păng jang hadoi kiơ̆ tơring. Ƀar pah adoi pơma đam gah dôm tơdrong đei ƀôh lơ̆m tơring păng lơ̆m apŭng plenh teh mă 2 pah atŭm tơrĕk truh, jang hadoi lơ̆m dôm tơdrong kăl lơ̆m kơpal teh; sơkơ̆t hơdah pơtoi jang hadoi kơjăp, tơgŭm dih băl lơ̆m lơ tơdrong jang.

Thủ tướng teh đak bơ̆n Phạm Minh Chính pơtruh nơ̆r gah Nga tơgŭm tơdrong vei sơđơ̆ng, pơm jang hiôk hian tơ̆ tơring đak dơsĭ păng rơvơ̆ng plenh tơ̆ Biển Đông, sek tơlang dôm tơdrong tơgar hăm trong rơngei kiơ̆ pơkăp đơ̆ng luơ̆t apŭng plenh teh păng Tơchơ̆t đơ̆ng Liên hơp kuôk, mă hăt noh UNCLOS 1982.