Kơsơ̆ 10/2, Thủ tướng Phạm Minh Chính pơgơ̆r ‘Măng hop akŏm ‘măng mă 11 Khŭl pơgơ̆r jang Pơtôch tơdrong bơ̆jang kiơ̆ Tơdrong tơchơ̆t kơsô̆ 18-NQ/TW đơ̆ng Trung ương. ‘Măng hop akŏm âu akŏm ăn tơgop nơ̆r găh tơdrong jang proh hơmet bơngai jang anih dăr hơlen tŏ sĕt bơngai, pran, gơh hơgei, đei yua. Lơ̆m noh set hơlen găh tơdrong hơgăt, tơdrong kăl đơ̆ng tơdrong proh hơmet bơngai jang anih dăr hơlen; băt hơdăh tơdrong jang, hơnăp jang, trong jang pơgơ̆r khŭl jang; athei pơgơ̆r khŭl jang dăr hơlen kiơ̆ 2 jăl tơ̆ Trung ương păng tơring ‘noh tơ̆ dêh char.

Pơma pơtôch ‘măng hop akŏm, Thủ tướng Phạm Minh Chính pơma hơdăh, tơdrong proh hơmet bơngai jang kơ anih dăr hơlen athei tơlĕch đei yua ăn teh đak, ăn kon pơlei ‘noh kăl hloh; jang trong tơ jur jang, pơgơ̆r đơ̆ng Đảng păng teh đak, vei sơđơ̆ng tơdrong hơgăt tơ jur anih tơm păng ƀiên chê̆, hơtŏk ‘lơ̆ng đei yua, jơnei tơdrong jang đơ̆ng anih dăr hơlen. Hơdai hăm ‘noh, tơdrong proh hơmet khŭl jang athei hơmet ‘lơ̆ng dôm tơdrong ưh kơ ‘lơ̆ng, tang găn, hơdrom băl lơ̆m pơgơ̆r, bơ̆jang đơ̆ng dôm anih jang dăr hơlen nhen hrei ‘nâu. Thủ tướng athei Anih dăr hơlen Khŭl kơdră teh đak, Anih tơm Nội vụ păng anih jang ƀơm truh tơtĕnh jang đang tơdrong jang vă pơtruh ăn Anih tơm Chĭnh trĭ păng Khŭl pơgơ̆r jang kơ Trung ương set hơlen păng hơmet ăn pơtruh kơ Quốc hội đơ̆ng rŏng kơ Anih tơm Chĭnh trĭ hlôi ăn tơgop nơ̆r.