Hop akŏm Khŭl chĕp kơ̆l pơgơ̆r Trung ương Đảng khei 1/2025 hlôi tơchơ̆t lơ trong jang tơgŭm gĭt kăl găh proh hơmet, pơm tŏ sĕt bơngai jang; hơmet ming tơdrong hơgăt jang tŏk sơnăm 2025 đei 8% tơ̆ kơpal tŏk pran, hơdrin jang đang Trong tơlĕch jang 5 sơnăm 2021-2025 păng pơm tơdrong ‘lơ̆ng kơjăp, yak truh tơdrong hơgăt jang tŏk 2 kơsô̆ lơ̆m jăl jang 2026-2030. Pơma pơtôch ‘măng hop akŏm, Thủ tướng Phạm Minh Chính hlôi tơƀôh hơdăh dôm tơdrong jang đei, tam mă jang đei lơ̆m khei 1, tơdrong tơm pơm ăn păng ƀai hŏk hlôh vao. Tơ̆ hơnăp kơnh, Thủ tướng athei, jang kiơ̆ kơjăp Tơdrong tơchơ̆t đơ̆ng Đảng, tơdrong chĕp kơ̆l, pơgơ̆r đơ̆ng Trung ương, Anih tơm Chĭnh trĭ, dôm bơngai chĕp kơ̆l dơnơm, vă pơm hơdăh ‘lơ̆ng jing trong tơlĕch jang, trong bơ̆jang kiơ̆ đơ̆ng rim anih jang, rim tơring. Athei đei đon pơhnŏng ‘lơ̆ng, hơdrin tih, bơ̆jang kơtang hloi iŏk năr blŭng, khei blŭng sơnăm 2025.

Kiơ̆ lơ̆m tơdrong hlôh vao pơgơ̆r vei lăng hlôi đei,kăl kơ athei pran kơtang hloh dơ̆ng, pơm tơ ‘ngla tơdrong hloh dơ̆ng, bơ̆jang đei yua hloh dơ̆ng; hơtŏk ‘lơ̆ng đei yua jang hơdai, mă loi ‘noh jĭ lơ̆m hơmet pơ ‘lơ̆ng dôm tơdrong ƀơm truh lơ anih jang, lơ tơring; kơchăng roi tơbăt păng tơlĕch trong jang dôm tơdrong ưh kơ gơh jang.