Truh dang ei, tơdrong jang hlôi keh đang, pơjao hloh 44 rơbâu tŏ hnam vă dôm unh hnam đei oei lơ̆m hnam 'nao; atŭm hăm noh man hloh 34 rơbâu tŏ hnam. Truh dang ei jơ̆p teh đak oei pơhlom 240 rơbâu tŏ hnam hyah hyok, hnam pơgia athei ming hơmet, man 'nao vă keh đang đơ̆ng dang ei truh hơtuch sơnăm 2025. Tang măt ăn Jơnŭm pơgơ̆r jang, Thủ tướng Phạm Minh Chính hmach bơnê hăm Anih tơm Asong jang – Linh jĭ rơka păng Tơpôl, Anih tơm vei lăng khul linh, Anih tơm Kŏng an, rim anih jang tơm, anih jang tơ̆ tơring, rim tơring hlôi kơchăng pơm jang đei jơnei dôm sơnong jang đei tơlĕch, tơgop lơ̆m dôm tơdrong jang đei kơ Tơdrong pơkăp jang.

Thủ tướng Phạm Minh Chính ră hơdah, tơdrong keh đang sut lê̆ hnam hyah hyok, hnam pơgia jĭ sơnong jang chĭnh trĭ kăp gĭt hlôi đei tơbang hơdah lơ̆m dôm Tơchơ̆t, pơgơ̆r jang đơ̆ng Trung ương Đảng, Anih tơm Chĭnh trĭ, Ƀan ƀĭ thư, Kuôk hô̆i, Jơnŭm pơgơ̆r teh đak, Thủ tướng teh đak, hơyak truh tơbăt dôm năr lêh tih lơ̆m sơnăm 2025 păng pơlong jang sơng kơ kuh kơ Hop akŏm Đảng ƀô̆ dôm jăl jang, tơrĕk truh Hop akŏm Đảng jơ̆p teh đak 'măng mă 14.