Tơ̆ jơ pơma đam, tang măt ăn dôm anih jang mŭk drăm păng jơnŭm jang thơ thou hơ-iă hăm dôm tơdrong đei jơnei lơ̆m hơtŏk mŭk drăm tơpôl mă Việt Nam hlôi jang đei lơ̆m dôm sơnăm ou ki, jĭ anih hơdah gah hơtŏk tơ-iung kơ apŭng plenh teh. Atŭm hăm noh bơnê kơ tơdrong asong jang tơ̆ Việt Nam roi năr roi hơtŏk 'lơ̆ng păng jĭ anih truh asong jang 'lơ̆ng hloh lơ̆m apŭng plenh teh. Rim bơngai tang măt adoi pơtruh nơ̆r hăm Jơnŭm pơgơ̆r teh đak, Thủ tướng teh đak gah dôm tơdrong đei tơrĕk truh hla bar hanh chĭn, thuê̆, haih kuan, kơ̆l 'ngok kơmăi kơmŏk hơgei 'nâu nai hia, păng hơpơi 'meh pơtoi asong pơm jang tơ̆ Việt Nam lơ̆m tơdrong jang unh hơyuh đơ̆ng kial tơ̆ đak dơsĭ, unh hơyuh jơ̆ng 'năr.

Pơtruh nơ̆r ah pơma đam, Thủ tướng Phạm Minh Chính bơnê kơ anih jang mŭk drăm Châu Âu hlôi lăng Việt Nam nhen pơlei pơla kơ po vă asong jang tĕch pơdro. Thủ tướng hơpơi 'meh rim anih jang mŭk drăm châu Âu pơtoi asong jang tơ̆ Việt Nam. Thủ tướng sơkơ̆t hơdah, Việt Nam kơchăng pơklaih rim tơdrong tơnap tap tơhlăk tơhlĭn, pơm trong hiôk vă anih jang mŭk drăm EU pơm jang hơtŏk tơ-iung.