Truh năm ngôi, pơlung tơpôl bơngai Việt Nam tơ̆ Hơnih tĕch mơdro Sapa Thủ tướng Phạm Minh Chính hlôi năm ngôi tơ̆ Hơnih pơtho nơ̆r Yuăn Praha. Đe thây kô pơtho hŏk kiơ̆ lơ̆m jơhngơ̆m chă tơgŭm kơdih, ưh kơ sa jên khei mă lăp đei jên tơgŭm tŏ sĕt jô̆ kiơ̆ jơ pơtho. Lơ̆m 22 sơnăm âu ki, Hơnih pơtho hŏk hlôi pơtho nơ̆r Yuăn ăn kơ rơbâu ‘nu đe mon rơneh păng tih vơ̆ tơ̆ teh đak Czech gơh đŏk, gơh chih, gơh pơma nơ̆r Yuăn kloh klĕch.

Thủ tướng Phạm Minh Chính pơma hơdăh, nơ̆r Yuăn ‘noh jĭ gơng tơƀưh đơ̆ng dôm jơhnơr hơdrol păng đơ̆ng rŏng, tơgŭm jơhnơr mơlôh Việt Nam oei tơ̆ teh đak đe hlôh băt dơ̆ng găh tơdrong joăt oei sa, jơhnơr hơrih kơ teh đak, pơhrăm ming jơhngơ̆m ‘mêm kơ teh đak, chhôk ‘nă hơdrĕch hơdrŭng. Athei Hơnih pơtho hŏk hơnơ̆ng pơm lơ dôm trong jang pơtho păng hŏk, pơm dơ̆ng tơdrong hơiă ăn kơ đe mon hŏk pơhrăm.