Iung pơma tơ̆ hop akŏm, Thủ tướng Phạm Minh Chính hlôi tơƀôh hơdăh dôm tơdrong lơ̆m apŭng plĕnh teh păng lơ̆m teh đak đơ̆ng noh tơbăt hơdăh găh tơdrong jang kơ hơnih mơdro sa teh đak, lơ̆m ou pơma hơdăh: Rim hơnih mơdro sa teh đak kăl tơgop pơm pơtrŭt kơtang ăn tơdrong jang mŭk drăm pran kơtang hloh kơjăp ‘lơ̆ng hloh ba teh đak atŏk tơ iung kơtang lơ̆m khei năr kơnh; Kăl tơplih jơhngơ̆m đon tơchĕng, trong iung jang păng kăl iung jang kiơ̆ đơ̆ng ƀôh yan ou, kăl hơvơn jơhngơ̆m pran kơ kon pơlei vă vang iung jang; Kăl dăr lăng, tơmơ̆t dơ̆ng pơm pơkeh tơdrong tơchơ̆t; Kăl tơlĕch đei trong jang tơgŭm djru vă pơjing đei kon jên hu, vă kon jên hu đei lơ hloh ƀar ‘măng, pêng ‘măng, pơm hơyak pran kơtang, pơm hơnih gơnang kơjăp vă kơ bơ̆n iung yak kơtang hloh. Thủ tướng tơbăt, sơnăm 2025 jĭ tôch gĭt kăl, jĭ sơnăm atŏk kơtang, hơdrin tŏk mŭk drăm GDP iŏk đei tŏ sĕt hloh 8%, pơjing hơyak, jơhngơm pran, hưch hanh vă dôm sơnăm đơ̆ng rŏng tŏk 2 kơsô̆. Hăm hơnăp jang păng tơdrong đei kơ dih, Thủ tướng athei, rim hơnih mơdro sa Teh đak kăl tŏk kơtang hơnhăk teh đak atŏk tơ iung tĕnh koăng păng kơjăp ‘lơ̆ng.