Thủ tướng pơma hơdăh, sơnăm 2025, Khul kơdră Teh đak gô pơjao trong atŏk tơ iung ăn rim tơring, hơnih jang đei ƀơm truh, rim hơnih mơdro sa kơ teh đak. Kiơ̆ đơ̆ng Thủ tướng, tơdăh atŏk tơ iung păh ai hơnơ̆ng lei jang ưh kơ keh đang 2 trong tơlĕch jang tơm atŏk tơ iung 100 sơnăm. ‘Meh vă jang keh đang lei sơnăm 2025 kăl tŏk mŭk drăm tŏ sĕt hloh 8% GDP vă pơjing hơyak, jơhngơ̆m pran, pơjing đei jơhngơ̆m đon chơt hơ iă ăn sơnăm đơ̆ng tŏk tŏk 2 kơsô̆ păng tơdrong mă ou kăl đei vang iung jang kơtang đơ̆ng khul mơdro sa, mă kăl rim hơnih mơdro sa tih. Thủ tướng Phạm Minh Chính athei rim hơnih  mơdro sa lăng năng bơ̆n gơ̆h jang yă kiơ đơ̆ng noh chih apinh kĭ pơkăp vang iung jang păng tơlĕch trong chă tơgŭm djru vă vang iung jang. Thủ tướng Teh đak hơpơi ‘meh vă kơdră chĕp pơgơ̆r rim hơnih mơdro sa đơ̆ng dôm tơdrong băt hlôh ƀôh hơdăh yan ou, tơdrong jang jơnei, jơhngơ̆m đon tơnăp, dăh vang tơgop nơ̆r tơpăt, trŏ lăp, đĭ đăng kơ yuơ tơdrong atŏk tơ iung kơ teh đak, kơ yuơ tơdrong phĭ tơtŏ dơnŏ ‘lơ̆ng dơ̆ng kơjăp, hơnŭk hơnoa kơ kon pơlei.