Tơ̆ jơ pơma đam, Thủ tướng Phạm Minh Chính pơma hơdăh, ‘măng năm hơpong đơ̆ng Thủ tướng Kyrgyzstan ‘nŏh jĭ jơnăr tôch gĭt kăl, pơih đei jăl jang hơdoi ‘nao ăn tơdrong pơvei ‘lơ̆ng hơiă đơ̆ng sơ̆ kơ Việt Nam păng Kyrgyzstan, năm truh pơm hơtŏk tơdrong pơvei jing jang hơdoi gĭt kăl tôm tơdrong.

Ƀar Thủ tướng pơma hơdăh tơdrong gĭt kăl đơ̆ng vei kơjăp trong pơgơ̆r tơƀâp, pơma nuh ăn rim khul grŭp, mă loi jĭ khul jang kơpal kŭm nhen đơ̆ng dôm anih tơm, tơring tơrang, đei hloi tơdrong tơƀâp 2 pang tơ̆ dôm hop akŏm lơ̆m apŭng plenh teh, kăl hlŏh ‘nŏh tơ̆ Liên hợp quốc; năm truh tơdrong pơjing lơ trong pơma nuh tơpăt ‘lơ̆ng vă hơtŏk tơdrong đei yoa đơ̆ng dôm tơdrong drơ̆ng nơ̆r hlôi iŏk đei.

Thủ tướng Phạm Minh Chính pơma hơdăh Việt Nam ‘mĕh pơm gơng tơƀưh vă Kyrgyzstan hơtŏk tơdrong jang hơdoi hăm ASEAN, hơpơi ‘mĕh Kyrgyzstan hơtŏk hơnăp jang, pơm gơng tơƀưh ăn Việt Nam hăm tơring Trung Á; athei Kyrgyzstan tơgŭm ăn trong jang đơ̆ng Việt Nam păng ASEAN găh tơdrong tơ̆ đak dơsĭ Biển Đông.