Tơ̆ pơma đam, ƀar Kơdră chĕp kơ̆l drơ̆ng nơ̆r hơtŏk tơdrong pơvei Việt Nam - New Zealand tŏk Jang hơdai Gĭt kăl Tôm tơdrong, pơm lăp hăm hơpơi ‘meh vă đơ̆ng kon pơlei 2 teh đak păng tơgop lơ̆m tơdrong rơngei, sơđơ̆ng, jang hơdai păng hơtŏk tơiung tơ̆ tơring păng lơ̆m apŭng plĕnh teh; hơdai hăm pơma hơdăh kăl kơ jăh pơjing Tơdrong jang tơlĕch jang tơdrong pơvei Jang hơdai Gĭt kăl Tôm tơdrong jăl jang 2025-2028 vă pơm hơdăh dôm tơdrong đơ̆ng tơdrong pơvei ‘nao hăm dôm tơdrong pơcheh, trong tơlĕch jang, tơdrong jang hơdai hơdăh.

Găh dôm tơdrong tơring, apŭng plĕnh teh, 2 păh drơ̆ng nơ̆r lơ̆m khei ‘năr apŭng plĕnh teh păng tơring đei dôm tơdrong tơplih gĭt kăl, 2 teh đak hơdrin pơtrŭt pơma dơnuh, pơjing đon lui tơ̆ tơring; hơtŏk loi dơ̆ng jang hơdai kơjăp păng tơgŭm băl tơ̆ dôm hop akŏm tơring păng apŭng plĕnh teh, mă loi ‘noh jĭ Liên hợp quốc, ASEAN păng dôm trong jang yua đơ̆ng ASEAN pơgơ̆r, hơtŏk ‘lơ̆ng hơnăp jang tơm đơ̆ng ASEAN lơ̆m trong jang tơring tŏk bŏk jang.