Thủ tướng pơma hơdăh, Việt Nam ling lang năng kăl păng hơpơi ‘mĕh pơm hơtŏk tơdrong pơvei hăm dôm teh đak boăl juăt đơ̆ng sơ̆ tơ̆ Trung Đông Âu, lơ̆m noh Ba Lan jĭ 1 lơ̆m dôm teh đei pơ ‘nhŏ jang hơdoi hơdrol hlŏh.

Tơ̆ jơ tơƀâp, 2 ‘nu Kơdră chĕp kơ̆l tơƀôh jơhngâm đon chơt hơiă găh dôm hơyak tŏk pran ‘lơ̆ng đơ̆ng tơdrong pơvei Việt Nam - Ba Lan lơ̆m rim tơdrong. Mŭk drăm – tĕch mơdro jing tơdrong hơiă hlŏh lơ̆m tơdrong jang hơdoi 2 pang hăm jên tĕch mơdro 2 păh đơ̆ng sơnăm 2020 truh dang ei hơnơ̆ng iŏk đei hlŏh 2,5 ti USD, hơdrô̆ sơnăm 2024 iŏk đei hlŏh 3 ti USD, pơm ăn teh đak Ba Lan jing teh đak teưch mơdro hơdai tih hlŏh hăm Việt Nam tơ̆ tơring Trung Đông Âu. Kơdră chĕp kơ̆l 2 teh đak oei pơam nuh găh trong vă jang gĭt kăl vă hơnhăk tơdrong pơvei 2 teh đak roi đunh roi tŏk ‘lơ̆ng, đei yoa, jăh pơm hơtŏk tơdrong pơvei Việt Nam – Ba Lan tŏk jing tơdrong pơvei gĭt kăl.