Lăng ‘lơ̆ng dôm tơdrong jang đơ̆ng Grŭp jang, Thủ tướng Phạm Minh Chính lui ngeh dôm Tơdrong jang âu gô tơgop ‘lơ̆ng lơ̆m tơdrong hơtŏk tơiung lơ̆m anih jang Logistics kơ Việt Nam, kŭm nhen tơdrong pơvei tơbôl jang hơdai đơ̆ng Việt Nam păng Nhật Bản.

Găh kơ dih kâu, Thủ tướng Phạm Minh Chính athei Grŭp jang Yamato Holdings tơmơ̆t jên jang lơ̆m dôm tơdrong jang iŏk yua khoa hŏk kơmăy kơmŏk, tơplih ‘nao hơgei, tơplih kơsô̆, pơtho pơhrăm bơngai jang găh tơdrong jang gre kơdâu, tơmơ̆t jên jang hơtŏk tơiung dôm anih jang logistics, jên hu, ƀao hiêm, kơmăy kơmŏk kơtơ̆ng ang; jang hơdai, tơgŭm, pơtho pơjao kơmăy kơmŏk hăm dôm bơngai jang hơdai Việt Nam, tơgŭm Việt Nam vang jang jrŭ hloh lơ̆m trong jang pơtruh đơ̆ng tơring păng apŭng plĕnh teh. Pơma dơnuh hăm Thủ tướng Phạm Minh Chính găh tơmam ‘lơ̆ng păng tơdrong pran đơ̆ng grŭp jang, Ƀok Nagao Yutaka roi tơbăt, grŭp jang gô pơtho pơhrăm bơngai jang, iŏk yua kơmăy kơmŏk, tơplih kơsô̆, khoa hŏk chih răk, gơh hơgei lơ̆m hơtŏk tơiung tơdrong jang găh gre kơdâu, logistics tơ̆ Việt Nam.